Usirikaya Pulihora : ఉసిరికాయ పులిహోర.. ఉసిరికాయ‌ల‌తో చేసే ఈ పులిహోర చాలా రుచిగా ఉంటుంది. పుల్ల పుల్ల‌గా తిన్నా కొద్ది తినాల‌నిపించేంత రుచిగా ఉంటుంది. అలాగే ఉసిరికాయ‌ల‌ను తీసుకోవ‌డం వల్ల మ‌న శ‌రీరానికి కూడా ఎంతో మేలు క‌లుగుతుంది. ఉసిరికాయ‌లు ల‌భించిన‌ప్పుడు వాటితో ఇలా పులిహోరను త‌యారు చేసి తీసుకోవ‌డం వల్ల రుచికి రుచిని ఆరోగ్యానికి ఆరోగ్యాన్ని పొంద‌వ‌చ్చు. త‌రుచూ చింత‌పండు, నిమ్మ‌ర‌సంతోనే కాకుండా ఇలా ఉసిరికాయ‌ల‌తో కూడా పులిహోరను త‌యారు చేసి తీసుకోవ‌చ్చు. ఉసిరికాయ‌ల‌తో రుచిగా, క‌మ్మ‌గా పులిహోరను ఎలా త‌యారు చేసుకోవాలో ఇప్పుడు తెలుసుకుందాం.
ఉసిరికాయ పులిహోర త‌యారీకి కావ‌ల్సిన ప‌దార్థాలు..
అన్నం – ఒక గ్లాస్ బియ్యంతో వండినంత, ఉసిరికాయ‌లు – 6, ఉప్పు – త‌గినంత, ప‌సుపు – పావు టీ స్పూన్, ధ‌నియాలు – అర టేబుల్ స్పూన్, నువ్వులు – ఒక టేబుల్ స్పూన్, నూనె -2 నుండి 3 టేబుల్ స్పూన్స్, తాళింపు దినుసులు – ఒక టేబుల్ స్పూన్, ఎండుమిర్చి – 3, ప‌ల్లీలు – 2 టేబుల్ స్పూన్స్, అల్లం తురుము – ఒక టేబుల్ స్పూన్స్, క‌రివేపాకు – 2 రెమ్మ‌లు, త‌రిగిన ప‌చ్చిమిర్చి – 4, ఇంగువ – పావు టీ స్పూన్, త‌రిగిన కొత్తిమీర – కొద్దిగా.
ఉసిరికాయ పులిహోర త‌యారీ విధానం..
ముందుగా బియ్యంలో త‌గినంత ఉప్పు వేసి పొడిపొడిగా వండుకోవాలి. త‌రువాత అన్నాన్ని ఆర‌బెట్టుకోవాలి. త‌రువాత ఉసిరికాయ‌ల‌ను ముక్క‌లుగా చేసి, ఇందులోనే ఉప్పు, ప‌సుపు వేసి మ‌రీ మెత్త‌గా కాకుండా మిక్సీ ప‌ట్టుకుని గిన్నెలోకి తీసుకోవాలి. త‌రువాత క‌ళాయిలో ధ‌నియాలు వేసి వేయించాలి. ఇవి వేగిన త‌రువాత నువ్వులు వేసి వేయించి జార్ లోకి తీసుకోవాలి. వీటిని మెత్త‌ని పొడిగా చేసుకుని ప‌క్క‌కు ఉంచాలి. త‌రువాత క‌ళాయిలో నూనె వేసి వేడి చేయాలి. త‌రువాత తాళింపు దినుసులు, ఎండుమిర్చి, ప‌ల్లీలు వేసివేయించాలి.
త‌రువాత అల్లం తురుము, క‌రివేపాకు, ప‌చ్చిమిర్చి, ఇంగువ వేసి వేయించాలి.త‌రువాత మిక్సీ ప‌ట్టుకున్న ఉసిరికాయ మిశ్ర‌మం, ధ‌నియాల మిశ్ర‌మం వేసి క‌ల‌పాలి. దీనిని ప‌చ్చి వాస‌న పోయే వ‌ర‌కు వేయించిన త‌రువాత అన్నం, కొత్తిమీర వేసి క‌ల‌పాలి. దీనిని అంతా క‌లిసేలా క‌లుపుకుని స్ట‌వ్ ఆఫ్ చేసుకోవాలి. ఇలా చేయ‌డం వల్ల ఎంతో రుచిగా ఉండే ఉసిరికాయ పులిహోర త‌యార‌వుతుంది. దీనిని తిన‌డం వల్ల మ‌నం రుచితో పాటు ఆరోగ్యాన్ని కూడా పొంద‌వ‌చ్చు. ఈ విధంగా ఉసిరికాయ‌ల‌తో త‌యారు చేసిన పులిహోరను అంద‌రూ ఎంతో ఇష్టంగా తింటారు.
