Vellulli Charu : వెల్లుల్లి చారు.. వెల్లుల్లిపాయ‌ల‌తో చేసే ఈ చారు చాలా రుచిగా ఉంటుంది. ఈ చారును తీసుకోవ‌డం వ‌ల్ల మ‌నం రుచితో పాటు ఆరోగ్య ప్ర‌యోజనాల‌ను కూడా పొంద‌వ‌చ్చు. జలుబు, దగ్గు, గొంతునొప్పి, జ్వ‌రం వంటి స‌మ‌స్య‌ల‌తో బాధ‌ప‌డుతున్న‌ప్పుడు ఈ చారును తీసుకోవ‌డం వ‌ల్ల మంచి ఫ‌లితం ఉంటుంది. వెల్లుల్లి చారును తీసుకోవ‌డం వ‌ల్ల వాతావ‌ర‌ణ మార్పుల కార‌ణంగా త‌లెత్తే అనారోగ్య స‌మ‌స్య‌లు రాకుండా ఉంటాయి. ఈ వెల్లుల్లి చారును త‌యారు చేసుకోవ‌డం చాలా సుల‌భం. 15 నుండి 20 నిమిషాల్లో ఈ చారును త‌యారు చేసుకోవ‌చ్చు. రుచితో పాటు ఆరోగ్యాన్ని అందించే వెల్లుల్లి చారును ఎలా త‌యారు చేసుకోవాలి.. త‌యారీకి కావ‌ల్సిన పదార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
వెల్లుల్లి చారు త‌యారీకి కావ‌ల్సిన పదార్థాలు..
నాన‌బెట్టిన చింత‌పండు -నిమ్మ‌కాయంత, ట‌మాట – 1, మిరియాలు – అర టీ స్పూన్, ధ‌నియాలు – అర టీ స్పూన్, జీల‌క‌ర్ర – ఒక టీ స్పూన్, కందిప‌ప్పు – ఒక టేబుల్ స్పూన్, ఎండుమిర్చి – 2, వెల్లుల్లి రెబ్బ‌లు – 5, నూనె – ఒక టేబుల్ స్పూన్, తాళింపు దినుసులు – ఒక టీ స్పూన్, దంచిన వెల్లుల్లి రెమ్మ‌లు – 5, త‌రిగిన ప‌చ్చిమిర్చి – 2, ప‌సుపు – పావు టీ స్పూన్, క‌రివేపాకు – 2 రెమ్మ‌లు, ఇంగువ – పావు టీ స్పూన్, నీళ్లు -ఒక‌టిన్న‌ర గ్లాస్, ఉప్పు – త‌గినంత, త‌రిగిన కొత్తిమీర – కొద్దిగా.
వెల్లుల్లి చారు త‌యారీ విధానం..
ముందుగా నాన‌బెట్టిన చింత‌పండులో ట‌మాట వేసి చేత్తో బాగా న‌లిపి ర‌సాన్ని తీసుకోవాలి. త‌రువాత జార్ లో మిరియాలు, ధ‌నియాలు, జీల‌క‌ర్ర, కందిప‌ప్పు, ఎండుమిర్చి, వెల్లుల్లి రెబ్బ‌లు వేసి మెత్త‌గా మిక్సీ ప‌ట్టుకోవాలి. త‌రువాత క‌ళాయిలో నూనె వేసి వేడి చేయాలి. త‌రువాత తాళింపు దినుసులు వేసి వేయించాలి. త‌రువాత వెల్లుల్లి రెమ్మ‌లు, ప‌చ్చిమిర్చి వేసి వేయించాలి. త‌రువాత ప‌సుపు, క‌రివేపాకు, ఇంగువ వేసి వేయించాలి. త‌రువాత మిక్సీ ప‌ట్టుకున్న పొడి వేసి వేయించాలి. ఇవ‌న్నీ వేగిన త‌రువాత చింత‌పండు ర‌సం, నీళ్లు, ఉప్పు వేసి క‌ల‌పాలి. దీనిని ఒక పొంగు వ‌చ్చే వ‌ర‌కు బాగా మ‌రిగించాలి. చారు మ‌రిగిన త‌రువాత కొత్తిమీర చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే వెల్లుల్లి చారు త‌యార‌వుతుంది. దీనిని అన్నంతో తింటే చాలా రుచిగా ఉంటుంది. ఈ విధంగా వెల్లుల్లి చారును త‌యారుచేసి తీసుకోవ‌డం వ‌ల్ల రుచితో పాటు ఆరోగ్యాన్ని కూడా పొంద‌వ‌చ్చు.
