Wheat Flour Bonda : మ‌నం గోధుమపిండితో చ‌పాతీ, రోటీ, పుల్కా, పూరీ వంటి వాటినే కాకుండా ఇత‌ర ఆహార ప‌దార్థాల‌ను కూడా త‌యారు చేస్తూ ఉంటాము. గోధుమపిండితో చేసుకోద‌గిన రుచిక‌ర‌మైన వంట‌కాల‌ల్లో బోండాలు కూడా ఒక‌టి. గోధుమపిండితో చేసే ఈ బోండాలు చాలా రుచిగా ఉంటాయి. అల్పాహారంగా, స్నాక్స్ గా తినడానికి ఇవి చాలా చ‌క్క‌గా ఉంటాయి. త‌ర‌చూ మైదాపిండితో కాకుండా ఇలా గోధుమపిండితో కూడా రుచిక‌ర‌మైన బోండాల‌ను త‌యారు చేసుకుని తినవచ్చు. వీటిని త‌యారు చేయ‌డం కూడా చాలా సుల‌భం. ఎంతో క‌మ్మ‌గా ఉండే ఈ గోధుమ‌పిండి బోండాల‌ను ఎలా త‌యారు చేసుకోవాలో ఇప్పుడు తెలుసుకుందాం.
గోధుమ‌పిండి బోండాల త‌యారీకి కావ‌ల్సిన ప‌దార్థాలు..
గోధుమ‌పిండి – ఒక క‌ప్పు, బియ్యం పిండి – పావు క‌ప్పు, చిన్న‌గా తరిగిన ప‌చ్చిమిర్చి – 2, చిన్న‌గా తరిగిన ఉల్లిపాయ – 1, ఉప్పు – త‌గినంత, తరిగిన కొత్తిమీర – కొద్దిగా, జీల‌క‌ర్ర – ఒక టీ స్పూన్, పెరుగు – ఒక క‌ప్పు, నూనె – డీప్ ప్రైకు స‌రిప‌డా, వంట‌సోడా – అర టీ స్పూన్.
గోధుమ‌పిండి బోండాల త‌యారీ విధానం..
ముందుగా ఒక గిన్నెలో గోధుమ‌పిండిని తీసుకోవాలి. త‌రువాత ఇందులో బియ్యం పిండి వేసి క‌ల‌పాలి. త‌రువాత నూనె త‌ప్ప మిగిలిన ప‌దార్థాల‌ను ఒక్కొక్క‌టిగా వేసి క‌ల‌పాలి. త‌రువాత త‌గిన‌న్ని నీళ్లు పోసుకుంటూ బోండా పిండిలా క‌లుపుకోవాలి. త‌రువాత దీనిపై మూత పెట్టి గంట నుండి రెండు గంట‌ల పాటు పిండిని నాన‌బెట్టుకోవాలి. పిండి చ‌క్క‌గా పులిసిన త‌రువాత క‌ళాయిలో నూనె పోసి వేడి చేయాలి. నూనె వేడ‌య్యాక కొద్ది కొద్దిగా పిండిని తీసుకుంటూ బోండాల ఆకారంలో వేసుకోవాలి. వీటిని మ‌ధ్య‌స్థ మ‌టంపై రెండు వైపులా ఎర్ర‌గా అయ్యే వ‌ర‌కు కాల్చుకుని ప్లేట్ లోకి తీసుకోవాలి.ఇలా చేయ‌డం వ‌ల్ల ఎంతో రుచిగా ఉండే గోధుమ‌పిండి బోండాలు త‌యార‌వుతాయి. వీటిని ఏ చ‌ట్నీతో తిన్నా కూడా చాలా రుచిగా ఉంటాయి. బోండాలు తినాల‌నిపించిన‌ప్పుడు ఇలా రుచిగా, ఆరోగ్యానికి హాని క‌ల‌గ‌కుండా గోధుమపిండితో బోండాల‌ను త‌యారు చేసుకుని తినవచ్చు. వీటిని అంద‌రూ ఎంతో ఇష్టంగా తింటారు.
