Wheat Rava Payasam : పాయసం.. ఈ పేరు చెప్ప‌గానే స‌హ‌జంగానే ఎవ‌రికైనా స‌రే నోట్లో నీళ్లూర‌తాయి. పాయ‌సాన్ని సేమ్యాతో ఎక్కువ మంది త‌యారు చేస్తార‌న్న సంగ‌తి తెలిసిందే. అయితే సేమ్యా కాకుండా గోధుమ ర‌వ్వ‌తోనూ ఎంతో తియ్య‌గా ఉండే పాయ‌సాన్ని త‌యారు చేయ‌వ‌చ్చు. ఇది ఎంతో రుచిగా ఉంటుంది. అంద‌రికీ న‌చ్చుతుంది. దీన్ని చేయ‌డం కూడా సుల‌భ‌మే. ఈ క్ర‌మంలోనే గోధుమ ర‌వ్వ‌తో పాయ‌సాన్ని ఎలా త‌యారు చేయాలో ఇప్పుడు తెలుసుకుందాం.
గోధుమ రవ్వ పాయసం త‌యారీకి కావలసిన పదార్థాలు..
గోధుమ రవ్వ – ఒక కప్పు, నెయ్యి – కొద్దిగా, బెల్లం – ఒకటిన్నర కప్పు, కొబ్బరి పాలు – రెండు కప్పులు, యాలకుల పొడి – రెండు టేబుల్ స్పూన్లు, జీడిపప్పు, ఎండు ద్రాక్ష – గుప్పెడు, నీళ్లు – తగినన్ని.
గోధుమ రవ్వ పాయసం తయారీ విధానం..
ముందుగా స్టవ్ మీద కడాయి ఉంచి రెండు టేబుల్ స్పూన్ల నెయ్యి వేసుకుని జీడిపప్పు, ఎండు ద్రాక్ష వేసి దోరగా వేయించి పక్కన పెట్టుకోవాలి. అదే కడాయిలో మరి కొద్దిగా నెయ్యి వేసి గోధుమ రవ్వను దోరగా వేయించి పక్కన పెట్టుకోవాలి. ఇప్పుడు కుక్కర్‌లో బెల్లం, తగినన్ని నీళ్లు పోసి బాగా ఉడికించాలి. ఉడుకుతున్న మిశ్రమంలో ముందుగా వేయించి పెట్టుకున్న గోధుమరవ్వ వేసి చిన్న మంటపై బాగా కలియబెడుతూ రవ్వ చిక్కగా అయ్యే వరకు ఉడికించుకోవాలి.
ఆ తర్వాత అందులో కొబ్బరి పాలు, యాలకుల పొడి వేసి మరో రెండు నిమిషాల పాటు ఉడికించాలి. ఇలా ఉడికిన పాయసంలో ముందుగా వేయించి పెట్టుకున్న జీడిపప్పు, ఎండు ద్రాక్ష వేసి స్టవ్ ఆఫ్ చేయాలి. దీంతో ఎంతో రుచికరమైన గోధుమ రవ్వ పాయసం త‌యార‌వుతుంది. ఇది ఎంతో రుచిగా ఉంటుంది. అంద‌రూ ఇష్టంగా తింటారు.
