Biscuit Cup Cakes : మ‌న‌కు బేక‌రీల‌ల్లో ల‌భించే ప‌దార్థాల్లో క‌ప్ కేక్స్ కూడా ఒక‌టి. క‌ప్ కేక్స్ చాలా రుచిగా ఉంటాయి. పిల్లలు, పెద్ద‌లు అంద‌రూ వీటిని ఎంతో ఇష్టంగా తింటూ ఉంటారు. అలాగే వీటిని మ‌నం వివిధ రుచుల్లో ఇంట్లో కూడా త‌యారు చేస్తూ ఉంటాము. మ‌నం సుల‌భంగా చేసుకోద‌గిన క‌ప్ కేక్ వెరైటీల‌లో బిస్కెట్ క‌ప్ కేక్స్ కూడా ఒక‌టి. పిల్లలు ఎంతో ఇష్టంగా తినే బోర్ బ‌న్ బిస్కెట్ల‌తో చేసే ఈ క‌ప్ కేక్స్ చాలా రుచిగా ఉంటాయి. ఒవెన్ లేక‌పోయినా స‌రే ఈ క‌ప్ కేక్స్ ను మ‌నం అర‌గంట‌లో త‌యారు చేసుకోవ‌చ్చు. ఎంతో రుచిగా ఉండే బిస్కెట్ క‌ప్ కేక్స్ ను ఒవెన్ లేకుండా కూడా ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
బిస్కెట్ క‌ప్ కేక్స్ త‌యారీకి కావ‌ల్సిన ప‌దార్థాలు..
బోర్ బ‌న్ బిస్కెట్స్ – 150 గ్రా., బేకింగ్ పౌడ‌ర్ – అర టీ స్పూన్స్, పంచ‌దార పొడి – 2 టీ స్పూన్స్, వెనీలా ఎసెన్స్ – పావు టీ స్పూన్, చిన్న‌గా త‌రిగిన జీడిప‌ప్పు – 2 టీ స్పూన్స్.
బిస్కెట్ క‌ప్ కేక్స్ త‌యారీ విధానం..
ముందుగా వెడ‌ల్పుగా ఉండే గిన్నెలో 2 క‌ప్పుల ఉప్పు లేదా ఇసుక పోసి గిన్నె అంతా స్ప్రెడ్ చేసుకోవాలి. త‌రువాత దీనిపై స్టాండ్ ను ఉంచి మూత పెట్టి ఫ్రీ హీట్ చేసుకోవాలి. త‌రువాత బిస్కెట్ల‌ను ముక్క‌లుగా చేసి జార్ లోకి తీసుకోవాలి. త‌రువాత వీటిని పొడిగా చేసి గిన్నెలోకి తీసుకోవాలి. త‌రువాత ఇందులో బేకింగ్ పౌడ‌ర్, పంచ‌దార పొడి వేసి క‌ల‌పాలి. త‌రువాత త‌గిన‌న్ని నీళ్లు పోసుకుంటూ క‌లుపుకోవాలి. త‌రువాత వెనీలా ఎసెన్స్, జీడిప‌ప్పు ప‌లుకులు వేసి క‌లుపుకోవాలి. ఇప్పుడు చిన్న గిన్నెల‌ను తీసుకుని అందులో క‌ప్ కేక్ కు అవ‌స‌ర‌మ‌య్యే పేప‌ర్ క‌ప్స్ ను ఉంచాలి. త‌రువాత వీటిలో కేక్ మిశ్ర‌మాన్ని స‌గానికి వేసుకోవాలి.
ఈ గిన్నెల‌ను ఒక ప్లేట్ పైఉంచి ఫ్రీహీట్ చేసుకున్న గిన్నెలో స్టాండ్ పై ఉంచాలి. త‌రువాత మూత పెట్టి 5 నిమిషాల పాటు పెద్ద మంట‌పై బేక్ చేసుకోవాలి. త‌రువాత మంట‌ను మ‌ధ్య‌స్థంగా చేసి 15 నుండి 20 నిమిషాల పాటు బేక్ చేసుకుని స్ట‌వ్ ఆఫ్ చేసుకోవాలి. త‌రువాత ఈ క‌ప్ కేక్స్ ను బ‌య‌ట‌కు తీసి చ‌ల్లారిన త‌రువాత స‌ర్వ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే బిస్కెట్ క‌ప్ కేక్స్ త‌యార‌వుతాయి. పిల్లలు వీటిని మ‌రింత ఇష్టంగా తింటారు. ఇంట్లో చిన్న చిన్న పార్టీస్ జ‌రిగిన‌ప్పుడు ఇలా బిస్కెట్ల‌తో సుల‌భంగా, రుచిగా క‌ప్ కేక్స్ ను త‌యారు చేసుకోవ‌చ్చు.
