Chandrakala Sweet : మ‌న‌కు స్వీట్ షాపుల్లో ల‌భించే తీపి ప‌దార్థాల్లో చంద్ర‌క‌ళ స్వీట్ కూడా ఒక‌టి. ఈ స్వీట్ చాలా రుచిగా ఉంటుంది. మ‌ధ్య మ‌ధ్య‌లో కోవాతో గుండ్రంగా ఉండే ఈ స్వీట్ తిన్నా కొద్ది తినాల‌నిపించేంత రుచిగా నోట్లో వేసుకుంటే క‌రిగిపోయేంత మృదువుగా ఉంటుంది. అయితే చాలా మంది ఈ స్వీట్ ను మనం ఇంట్లో త‌యారు చేసుకోలేము అనుకుంటారు. కానీ ఈ స్వీట్ ను మనం చాలా సుల‌భంగా ఇంట్లో త‌యారు చేసుకోవ‌చ్చు. ఎంతో క‌మ్మ‌గా, తిన్నా కొద్ది తినాల‌నిపించేంత రుచిగా ఉండే ఈ చంద్ర‌క‌ళ స్వీట్ ను ఎలా త‌యారు చేసుకోవాలో ఇప్పుడు తెలుసుకుందాం.
చంద్ర‌క‌ళ స్వీట్ తయారీకి కావ‌ల్సిన ప‌దార్థాలు..
మైదాపిండి – ఒక‌టిన్న‌ర క‌ప్పు, ఉప్పు – చిటికెడు, వంట‌సోడా – చిటికెడు, నెయ్యి – పావు క‌ప్పు, పంచ‌దార – ఒక క‌ప్పు, నీళ్లు – అర క‌ప్పు, కుంకుమ పువ్వు – చిటికెడు, యాల‌కుల పొడి – కొద్దిగా, నూనె – డీప్ ప్రైకు స‌రిప‌డా.
కోవా తయారీకి కావ‌ల్సిన ప‌దార్థాలు..
చిక్క‌టి పాలు – లీట‌ర్, పంచ‌దార – 3 స్పూన్స్, నిమ్మ‌ర‌సం – 10 చుక్క‌లు, వేయించి త‌రిగిన జీడిప‌ప్పు – కొద్దిగా, వేయించి త‌రిగిన బాదంపప్పు – కొద్దిగా, యాల‌కుల పొడి – పావు టీ స్పూన్.
చంద్ర‌క‌ళ స్వీట్ త‌యారీ విధానం..
ముందుగా కోవా త‌యారు చేసుకోవ‌డానికి గిన్నెలోపాలు పోసి చిక్క‌బ‌డే వ‌ర‌కు క‌లుపుతూ మ‌రిగించాలి. పాలు చిక్క‌బ‌డిన త‌రువాత పంచ‌దార వేసి మ‌రింత చిక్క‌బ‌డే వ‌ర‌కు ఉడికించాలి. త‌రువాత పాలు బాగా మ‌రిగి కోవా త‌యారైన త‌రువాత నిమ్మ‌ర‌సం వేసి క‌లిసి ప్ట‌వ్ ఆఫ్ చేసుకోవాలి. త‌రువాత యాల‌కుల పొడి, డ్రై ఫ్రూట్స్ ప‌లుకులు వేసి క‌లుపుకోవాలి. త‌రువాత ఈ కోవాను చిన్న నిమ్మ‌కాయంత ప‌రిమాణంలో ఉండలుగా చేసుకుని పక్కకు ఉంచాలి. త‌రువాత గిన్నెలో మైదాపిండి, ఉప్పు, వంట‌సోడా వేసి క‌ల‌పాలి. త‌రువాత నెయ్యి వేసి క‌ల‌పాలి. త‌రువాత త‌గిన‌న్ని నీళ్లు పోస్తూ పిండిని క‌లుపుకోవాలి.
త‌రువాత దీనిపై మూత‌ను ఉంచి ప‌ది నిమిషాల పాటు పిండిని నాన‌బెట్టాలి. పిండి చ‌క్క‌గా నానిన త‌రువాత దీనిని మ‌రోసారి బాగా క‌లుపుకోవాలి. త‌రువాత దీనిని పిండిని ఉండలుగా చేసుకోవాలి. త‌రువాత ఒక్కో ఉండ‌ను తీసుకుని చ‌పాతీలా వ‌త్తుకోవాలి. త‌రువాత గుండ్రంగా ఉండే మూత‌తో పూరీల ప‌రిమాణంలో వ‌త్తుకోవాలి. ఇప్పుడు ఒక పూరీని తీసుకుని దానిపై కోవా ఉండ‌ను ఉంచాలి. త‌రువాత అంచుల‌కు నీటితో త‌డి చేసి దానిపై మ‌రో పూరీని ఉంచి అంచుల‌ను గట్టిగా వ‌త్తాలి. త‌రువాత అంచుల‌ను మ‌న‌కు న‌చ్చిన డిజైన్ లో చుట్టుకోవాలి. ఇలా అన్నింటిని త‌యారు చేసుకుని పక్కకు ఉంచాలి. త‌రువాత క‌ళాయిలో పంచ‌దార, నీళ్లుపోసి వేడి చేయాలి.
ఇందులోనే కుంకుమ పువ్వు, యాల‌కుల పొడి వేసి పంచ‌దార మిశ్ర‌మం జిగురుగా అయ్యే వ‌ర‌కు ఉడికించి స్ట‌వ్ ఆఫ్ చేసుకోవాలి. త‌రువాత క‌ళాయిలో నూనె పోసి వేడి చేయాలి. నూనె వేడ‌య్యాక ముందుగా త‌యారు చేసుకున్న చంద్ర‌క‌ళ‌ల‌ను వేసి వేయించాలి. వీటిని మ‌ధ్య‌స్థ మంట‌పై ఎర్ర‌గా అయ్యే వ‌ర‌కు వేయించి పంచ‌దార పాకంలో వేసుకోవాలి. వీటిని రెండు వైపులా అటూ ఇటూ తిప్పుతూ 5 నిమిషాల పాటు ఉంచి ప్లేట్ లోకి తీసుకుని స‌ర్వ్ చేసుకోవాలి. ఇలా చేయ‌డం వల్ల ఎంతో రుచిగా ఉండే చంద్ర‌క‌ళ స్వీట్ త‌యార‌వుతుంది. దీనిని అంద‌రూ ఎంతో ఇష్టంగా తింటారు. ఇంట్లో కోవాను త‌యారు చేసుకోవ‌డం వీలుకాని వారు బ‌య‌ట ల‌భించే కోవాను కూడా ఉప‌యోగించ‌వ‌చ్చు.
