Corn Kebab : స్వీట్ కార్న్ మన ఆరోగ్యానికి ఎంతో మేలు చేస్తుంద‌న్న సంగ‌తి మ‌న‌కు తెలిసిందే. వీటిని ఉడికించి తీసుకోవ‌డంతో పాటు వీటితో ర‌క‌ర‌కాల చిరుతిళ్ల‌ను త‌యారు చేస్తూ ఉంటాం. స్వీట్ కార్న్ తో చేసుకోద‌గిన రుచిక‌ర‌మైన చిరుతిళ్ల‌ల్లో కార్న్ కబాబ్ కూడా ఒక‌టి. స్వీట్ కార్న్ తో చేసే ఈ క‌బాబ్స్ చాలా రుచిగా క‌ర‌క‌ర‌లాడుతూ ఉంటాయి. స్నాక్స్ గా తిన‌డానికి ఇవి చ‌క్క‌గా ఉంటాయి. వీటిని త‌యారు చేయ‌డం కూడా చాలా తేలిక. రుచిగా క‌ర‌క‌ర‌లాడుతూ ఉండే ఈ కార్న్ క‌బాబ్స్ ను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
కార్న్ కబాబ్ త‌యారీకి కావ‌ల్సిన ప‌దార్థాలు..
స్వీట్ కార్న్ – 1, ఉడికించిమెత్త‌గా చేసిన బంగాళాదుంప‌లు – 200 గ్రా., చిన్న‌గా త‌రిగిన ఉల్లిపాయ – 1,చిన్న‌గా త‌రిగిన ప‌చ్చిమిర్చి – 2, తురిమిన క్యారెట్స్ – 2, శ‌న‌గ‌పిండి – అర క‌ప్పు, కార్న్ ఫ్లోర్ – 2 టేబుల్ స్పూన్స్, బ్రెడ్ క్రంబ్స్ -అర క‌ప్పు, అల్లం వెల్లుల్లి పేస్ట్ – ఒక టేబుల్ స్పూన్, గ‌రం మ‌సాలా – ఒక టీ స్పూన్, ఉప్పు – త‌గినంత, కారం – అర టేబుల్ స్పూన్, నూనె – డీప్ ప్రైకు స‌రిప‌డా, నిమ్మ‌కాయ – 1, త‌రిగిన కొత్తిమీర – కొద్దిగా.
కార్న్ కబాబ్ త‌యారీ విధానం..
ముందుగా స్వీట్ కార్న్ గింజ‌ల‌ను మెత్త‌గా ఉడికించాలి. త‌రువాత వాటిని జార్ లో మ‌రీ మెత్త‌గా కాకుండా మిక్సీ ప‌ట్టుకుని గిన్నెలోకి తీసుకోవాలి. త‌రువాత ఇందులో నూనె త‌ప్ప మిగిలిన ప‌దార్థాల‌న్నీ వేసి బాగా క‌ల‌పాలి. త‌రువాత ఈ మిశ్ర‌మాన్ని కొద్ది కొద్దిగా తీసుకుంటూ కబాబ్ ఆకారంలో వ‌త్తుకోవాలి. ఇలా అన్నింటిని వ‌త్తుకున్న త‌రువాత క‌ళాయిలో నూనె పోసి వేడి చేయాలి. నూనె వేడ‌య్యాక క‌బాబ్స్ ను వేసి వేయించాలి. వీటిని మ‌ధ్య‌స్థ మంట‌పై గోల్డెన్ బ్రౌన్ క‌ల‌ర్ వ‌చ్చే వ‌ర‌కు వేయించి ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే కార్న్ క‌బాబ్స్ త‌యార‌వుతాయి. వీటిని ట‌మాట కిచ‌ప్ తో క‌లిపి తింటే మ‌రింత రుచిగా ఉంటాయి. సాయంత్రం స‌మ‌యాల్లో అప్పుడ‌ప్పుడూ ఇలా కార్న్ క‌బాబ్స్ ను త‌యారు చేసుకుని తినవ‌చ్చు. వీటిని పిల్ల‌లు మ‌రింత ఇష్టంగా తింటారు.
