Kiwi Cooler Mocktail : కివి కూల‌ర్ మాక్టెల్.. కివి పండ్ల‌తో చేసే ఈ మాక్టెల్ చాలా రుచిగా ఉంటుంది. ముఖ్యంగా వేస‌వి కాలంలో తీసుకోవ‌డానికి ఇది చాలా చ‌క్క‌గా ఉంటుంది. ఈ మాక్టెల్ చ‌క్క‌టి రిఫ్రెష్ డ్రింక్ అని చెప్ప‌వ‌చ్చు. అలాగే పార్టీస్ లో కూడా ఈ మాక్టెల్ ను స‌ర్వ్ చేసుకోవ‌చ్చు. ఈ కివీ మాక్టెల్ ను త‌యారు చేయ‌డం చాలా తేలిక. కివి పండ్లు ఉంటే చాలు 5 నిమిషాల్లో ఈ మాక్టెల్ ను త‌యారు చేసుకోవ‌చ్చు. ఎంతో రుచిగా, చల్ల చ‌ల్ల‌గా ఉండే ఈ కివి మాక్టెల్ ను 5 నిమిషాల్లోనే ఎలా త‌యారు చేసుకోవాలో ఇప్పుడు తెలుసుకుందాం.
కివి కూల‌ర్ మాక్‌టెయిల్ త‌యారీకి కావ‌ల్సిన ప‌దార్థాలు..
చిన్న‌గా తరిగిన కివి పండ్లు – 2, నిమ్మ‌కాయ – 1, పంచ‌దార – 2 టేబుల్ స్పూన్స్, ఐస్ క్యూబ్స్ – 4.
కివి కూల‌ర్ మాక్‌టెయిల్ త‌యారీ విధానం..
ముందుగా రోట్లో కివి పండ్ల ముక్క‌లు వేసి 50 శాతం మెత్త‌గా అయ్యే వ‌ర‌కు క్ర‌ష్ చేసుకోవాలి. త‌రువాత నిమ్మ‌కాయ‌ను స్లైసెస్ గా క‌ట్ చేసి గింజ‌లు తీసేసి అదే రోట్లో వేసి క్ర‌ష్ చేసుకోవాలి. త‌రువాత పంచ‌దార వేసి క్ర‌ష్ చేసుకోవాలి. కివీ ముక్క‌లు పేస్ట్ లాగా కాకుండా కొద్దిగా ముక్క‌లుగా ఉండేలా చూసుకోవాలి. త‌రువాత ఈ మిశ్ర‌మాన్ని రెండు గ్లాసులల్లో స‌మానంగా వేసుకోవాలి. త‌రువాత ఐస్ క్యూబ్స్ వేసుకోవాలి. త‌రువాత గ్లాస్ ను సోడాతో లేదా స్ప్రైట్ తో నింపాలి. అంతే ఇలా చేయ‌డం వల్ల ఎంతో రుచిగా, చల్ల చ‌ల్ల‌గా ఉండే కివి కూల‌ర్ మాక్టెల్ త‌యార‌వుతుంది. దీనిని అంద‌రూ ఎంతో ఇష్టంగా తాగుతారు. చల్ల చ‌ల్ల‌గా ఏదైనా తాగాల‌నిపించిన‌ప్పుడు ఇలా కివితో మాక్‌టెయిల్ ను త‌యారు చేసి తీసుకోవ‌చ్చు.
