Palakova : మ‌నం ప్ర‌తిరోజూ ఆహారంలో భాగంగా పాల‌ను కూడా తీసుకుంటూ ఉంటాం. పాల‌ను తాగ‌డం వ‌ల్ల శ‌రీరానికి అవ‌స‌ర‌మ‌య్యే కాల్షియంతోపాటు ఇత‌ర పోష‌కాలు కూడా ల‌భిస్తాయి. పాల‌ను తాగ‌డం వ‌ల్ల మ‌నం అనేక ఆరోగ్య‌క‌ర‌మైన ప్ర‌యోజ‌నాల‌ను పొంద‌వ‌చ్చ‌ని నిపుణులు తెలియ‌జేస్తున్నారు. అయితే కొన్నిసార్లు మ‌నం వేడిచేసేట‌ప్పుడు పాలు విరిగిపోతూ ఉంటాయి. ఈ విరిగిన పాల‌ను సాధార‌ణంగా చాలా మంది పార‌బోస్తూ ఉంటారు. కానీ విరిగిన పాల‌ను పార‌బోయ‌కుండా వాటితో ఎంతో రుచిగా ఉండే పాల‌కోవాను త‌యారు చేసుకుని తిన‌వ‌చ్చు. విరిగిన పాల‌తో పాల‌కోవాను ఎలా త‌యారు చేసుకోవాలి.. దీని త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
పాల‌కోవా త‌యారీకి కావ‌ల్సిన ప‌దార్థాలు..
విరిగిన పాలు – ఒక లీట‌ర్, పంచ‌దార – ముప్పావు క‌ప్పు లేదా త‌గినంత, నిమ్మ‌ర‌సం – అర టీ స్పూన్.
పాల‌కోవా త‌యారీ విధానం..
ముందుగా విరిగిన పాలలో అర టీ స్పూన్ నిమ్మ‌ర‌సం వేసి క‌లుపుకోవాలి. ఈ పాలు పూర్తిగా విరిగే వ‌ర‌కు వేడి చేయాలి. త‌రువాత ఈ పాల విరుగుడును ఒక జ‌ల్లిగంటెలోకి తీసుకుని వాటిలోని నీరు అంతా పోయేలా చేసుకోవాలి. త‌రువాత ఈ పాల విరుగుడును నీళ్లు పోసుకుంటూ మ‌రోసారి అంతా బాగా క‌డ‌గాలి. ఇలా క‌డిగిన త‌రువాత పాల విరుగుడును మ‌రో గిన్నెలోకి తీసుకోవాలి. త‌రువాత పంచ‌దార‌ను వేసి చిన్న మంటపై పంచ‌దార పూర్తిగా క‌రిగే వ‌ర‌కు క‌లుపుతూ ఉండాలి.
పాల విరుగుడులోని నీరు అంతా పోయి ద‌గ్గ‌ర ప‌డే వ‌ర‌కు వేయించి స్ట‌వ్ ఆఫ్ చేసుకోవాలి. ఇప్పుడు ప‌ప్పు గుత్తి లేదా గంటె సహాయంతో పాల విరుగుడు మిశ్ర‌మాన్ని పూర్తిగా మెత్త‌గా చేసుకోవాలి. త‌రువాత చేతికి నెయ్యిని రాసుకుంటూ పాల‌విరుగుడు మిశ్ర‌మాన్ని త‌గిన ప‌రిమాణంలో తీసుకుంటూ బిళ్ల‌లుగా చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే పాల‌కోవా త‌యారవుతుంది. పాలు విరిగిన‌ప్పుడు వాటిని పార‌బోయ‌కుండా ఇలా పాల‌కోవాగా చేసుకుని తిన‌వ‌చ్చు. పాల విరుగుడుతో చేసిన ఈ పాల‌కోవా వారం రోజుల పాటు తాజాగా ఉంటుంది. దీన్ని అంద‌రూ ఎంతో ఇష్టంగా తింటారు.
