Mango Tomato Pappu : మ‌న‌లో చాలా మంది ట‌మాట పప్పును ఎంతో ఇష్టంగా తింటూ ఉంటారు. దీనిని మ‌నం త‌ర‌చూ త‌యారు చేస్తూనే ఉంటాం. అన్నం, చ‌పాతీలతో క‌లిపి తింటే ఈ ప‌ప్పు చాలా రుచిగా ఉంటుంది. ఈ ట‌మాట ప‌ప్పులో మామిడికాయ‌లు వేసి మ‌నం మ‌రింత రుచిగా కూడా త‌యారు చేసుకోవ‌చ్చు. మామిడికాయ వేసి చేసే ట‌మాట పప్పును చూస్తేనే నోట్లో నీళ్లు ఊరుతుంటాయి. మ‌రింత రుచిగా మామిడికాయ‌లు వేసి ట‌మాట పప్పును ఎలా త‌యారు చేసుకోవాలి..అన్న వివ‌రాల‌ను ఇప్పుడు తెలుసుకుందాం.
మామిడికాయ ట‌మాట ప‌ప్పు త‌యారీకి కావ‌ల్సిన ప‌దార్థాలు..
నాన‌బెట్టిన కందిప‌ప్పు – 150 గ్రా., త‌రిగిన మామిడికాయ – 1 ( మ‌ధ్య‌స్థంగా ఉన్న‌ది), త‌రిగిన ట‌మాటాలు – 4, త‌రిగిన ఉల్లిపాయ – 1, త‌రిగిన ప‌చ్చిమిర్చి – 4, కారం – ఒక టేబుల్ స్పూన్, ప‌సుపు – అర టీ స్పూన్, ఉప్పు – త‌గినంత, తాళింపు దినుసులు – ఒక టేబుల్ స్పూన్, ఎండుమిర్చి – 2, దంచిన వెల్లుల్లి రెబ్బ‌లు – 4, క‌రివేపాకు – ఒక రెమ్మ, నూనె – ఒక టేబుల్ స్పూన్, ఇంగువ – పావు టీ స్పూన్.
మామిడికాయ ట‌మాట ప‌ప్పు త‌యారీ విధానం..
ముందుగా కుక్క‌ర్ లో కందిప‌ప్పు, ఉల్లిపాయ ముక్క‌లు, ప‌చ్చిమిర్చి, ట‌మాట, మామిడికాయ ముక్క‌ల‌ను వేసుకోవాలి. త‌రువాత ఇందులో ముప్పావు గ్లాస్ నీళ్లు పోసి మూత పెట్టాలి. ఈ పప్పును మ‌ధ్య‌స్థ మంట‌పై 3 విజిల్స్ వ‌చ్చే వ‌ర‌కు ఉడికించాలి. త‌రువాత మూత తీసి పప్పును మెత్త‌గా చేసుకోవాలి. ఈ ప‌ప్పులో ఉప్పు, కారం, ప‌సుపు, పావు గ్లాస్ నీళ్లు పోసి క‌ల‌పాలి. ఇప్పుడు క‌ళాయిలో నూనె వేసి వేడి చేయాలి. నూనె వేడ‌య్యాక తాళింపు దినుసులు, ఎండుమిర్చి, ఇంగువ వేసి వేయించాలి. త‌రువాత క‌రివేపాకు, వెల్లుల్లి రెబ్బ‌లు వేసి వేయించాలి.
తాళింపు చ‌క్క‌గా వేగిన త‌రువాత ముందుగా త‌యారు చేసుకున్న పప్పును వేసి క‌ల‌పాలి. ఈ పప్పును మ‌రో 5 నిమిషాల పాటు ఉడికించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే మామిడికాయ ట‌మాట ప‌ప్పు త‌యార‌వుతుంది. దీనిని అన్నంలో నెయ్యి వేసుకుని తింటే చాలా రుచిగా ఉంటుంది. మామిడికాయ ట‌మాట పప్పును అంద‌రూ ఎంతో ఇష్టంగా తింటారు.
