Moong Dal Idli : మనం అల్పాహారంగా ఇడ్లీలను త‌యారు చేసి తీసుకుంటూ ఉంటాము. ఇడ్లీలను చాలా మంది ఇష్టంగా తింటారు. చ‌ట్నీ, సాంబార్ తో తింటే ఇవి చాలా రుచిగా ఉంటాయి. అయితే త‌రుచూ చేసే ఈ ఇడ్లీలను మనం మ‌రింత రుచిగా, ఆరోగ్యానికి మేలు చేసేలా కూడా త‌యారు చేసుకోవ‌చ్చు. కింద చెప్పిన విధంగా పెస‌ర‌ప‌ప్పుతో చేసే ఈ ఇడ్లీలు చాలా రుచిగా ఉంటాయి. అలాగే వీటిని తీసుకోవ‌డం వ‌ల్ల ఆరోగ్యానికి కూడా మేలు క‌లుగుతుంది. చ‌ట్నీ, సాంబార్ తో తింటే ఈ ఇడ్లీలు కూడా చాలా రుచిగా ఉంటాయి. వీటిని త‌యారు చేయ‌డం కూడా చాలా సుల‌భం. మ‌రింత రుచిగా, ఆరోగ్యానికి మేలు చేసేలా పెస‌ర‌ప‌ప్పుతో ఇడ్లీలను ఎలా త‌యారు చేసుకోవాలో ఇప్పుడు తెలుసుకుందాం.
మూంగ్ దాల్ ఇడ్లీ త‌యారీకి కావ‌ల్సిన ప‌దార్థాలు..
3 గంట‌ల పాటు నాన‌బెట్టిన పెస‌ర‌ప‌ప్పు – ఒక క‌ప్పు, బొంబాయి ర‌వ్వ – 2 టేబుల్ స్పూన్స్, పెరుగు – అర క‌ప్పు, క్యారెట్ తురుము – 2 టేబుల్ స్పూన్స్, ఉప్పు – త‌గినంత, చిన్న‌గా త‌రిగిన ప‌చ్చిమిర్చి – 2, నూనె – ఒక టేబుల్ స్పూన్, ఆవాలు – ఒక టీ స్పూన్, ఇంగువ – చిటికెడు, త‌రిగిన క‌రివేపాకు – ఒక రెమ్మ, వంటసోడా – అర టీ స్పూన్.
మూంగ్ దాల్ ఇడ్లీ త‌యారీ విధానం..
ముందుగా పెస‌ర‌ప‌ప్పును జార్ లో వేసి త‌గిన‌న్ని నీళ్లు పోసి మెత్త‌ని పేస్ట్ లాగా చేసుకోవాలి. త‌రువాత దీనిని ఒక గిన్నెలోకి తీసుకుని అందులో ర‌వ్వ, పెరుగు, ఉప్పు, క్యారెట్ తురుము, ప‌చ్చిమిర్చి వేసి క‌ల‌పాలి. త‌రువాత దీనిపై మూత పెట్టి 10 నిమిషాల పాటు ప‌క్క‌కు ఉంచాలి. పిండి మ‌రీ గట్టిగా ఉంటే త‌గిన‌న్ని నీళ్లు పోసి దోశ పిండిలా క‌లుపుకోవాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక ఆవాలు, క‌రివేపాకు, ఇంగువ వేసి వేయించాలి. త‌రువాత ఈ తాళింపును పిండిలో వేసి క‌ల‌పాలి.
త‌రువాత వంటసోడా వేసి క‌ల‌పాలి. ఇప్పుడు ఈ పిండిని ఇడ్లీ ప్లేట్ ల‌ల్లో వేసుకోవాలి. త‌రువాత ఇడ్లీ కుక్క‌ర్ లో నీళ్లు పోసి వేడి చేయాలి. నీళ్లు మ‌రిగిన త‌రువాత ఇడ్లీ ప్లేట్ ల‌ను ఉంచి మూత పెట్టి మ‌ధ్య‌స్థ మంట‌పై 12 నుండి 15 నిమిషాల పాటు ఉడికించి స్టవ్ ఆఫ్ చేసుకోవాలి. త‌రువాత వీటిని బ‌య‌ట‌కు తీసి 2 నిమిషాల పాటు అలాగే ఉంచాలి. త‌రువాత ప్లేట్ లో వేసుకుని స‌ర్వ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే మూంగ్ దాల్ ఇడ్లీలు త‌యార‌వుతాయి. వీటిని తిన‌డం వ‌ల్ల మనం రుచితో పాటు చక్క‌టి ఆరోగ్యాన్ని కూడా పొంద‌వ‌చ్చు.
