Palli Pakoda : మ‌నం ప‌ల్లీల‌ను కూడా ఆహారంగా తీసుకుంటూ ఉంటాం. ప‌ల్లీలు మ‌న ఆరోగ్యానికి ఎంతో మేలు చేస్తాయి. వీటిని తీసుకోవ‌డం వ‌ల్ల మ‌న శ‌రీరానికి అవ‌స‌ర‌మ‌య్యే ప్రోటీన్స్ తో పాటు ఇత‌ర పోష‌కాలు కూడా ల‌భిస్తాయి. వంట‌ల్లో వాడ‌డంతో పాటు ఈ ప‌ల్లీల‌తో మ‌నం చిరుతిళ్ల‌ను కూడా తయారు చేస్తూ ఉంటాం. ప‌ల్లీల‌తో చేసే చిరుతిళ్లల్లో ప‌ల్లిప‌కోడా కూడా ఒక‌టి. ప‌ల్లి ప‌కోడా చాలా రుచిగా ఉంటుంది. స్వీట్ షాపుల్లో మ‌న‌కు ఎక్కువ‌గా ఇవి ల‌భిస్తాయి. రుచిగా, క‌ర‌క‌ర‌లాడుతూ ఉండేలా ప‌ల్లిప‌కోడాల‌ను మ‌నం ఇంట్లో కూడా తయారు చేసుకోవ‌చ్చు. ప‌ల్లిప‌కోడాల‌ను ఎలా తయారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
ప‌ల్లి ప‌కోడా త‌యారీకి కావ‌ల్సిన ప‌దార్థాలు..
ప‌ల్లీలు – 200 గ్రా., ఉప్పు – త‌గినంత, బియ్యం పిండి – పావు క‌ప్పు, శ‌న‌గ‌పిండి – పావు క‌ప్పు, కారం – ముప్పావు టీ స్పూన్, గ‌రం మ‌సాలా – పావు టీ స్పూన్, చాట్ మ‌సాలా – పావు టీ స్పూన్, నిమ్మ‌ర‌సం – ఒక టీ స్పూన్, నూనె – డీప్ ఫ్రైకు స‌రిప‌డా.
ప‌ల్లి ప‌కోడా త‌యారీ విధానం..
ముందుగా ప‌ల్లీల‌ను ఒక గిన్నెలో తీసుకోవాలి. త‌రువాత అందులో నూనె త‌ప్ప మిగిలిన ప‌దార్థాల‌న్నీ వేసి క‌ల‌పాలి. త‌రువాత 3 లేదా 4 టేబుల్ స్పూన్ల నీళ్లు పోసుకుంటూ ప‌ల్లీల‌కు పిండిని ప‌ట్టించాలి. అలాగే పిండి గ‌ట్టిగా ఉండేలా చూసుకోవాలి. ఇప్పుడు క‌ళాయిలో నూనె పోసుకుని వేడి చేయాలి. నూనె వేడ‌య్యాక ప‌ల్లీల‌ను వేసి వేయించాలి. వీటిని వేసిన వెంట‌నే క‌ద‌ప‌కుండా కొద్దిగా కాలిన త‌రువాత క‌దుపుతూ వేయించాలి. వీటిని మ‌ధ్య‌స్థ మంట‌పై నెమ్మ‌దిగా క‌ర‌క‌ర‌లాడే వ‌ర‌కు వేయించుకుని ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే ప‌ల్లి ప‌కోడా తయార‌వుతుంది. దీనిని గాలి త‌గ‌ల‌కుండా నిల్వ చేసుకోవ‌డం వ‌ల్ల చాలా రోజుల పాటు తాజాగా ఉంటాయి. సాయంత్రం స‌మ‌యాల్లో, ప్ర‌య‌ణాల్లో తిన‌డానికి ఈ ప‌ల్లి ప‌కోడా చాలా రుచిగా ఉంటాయి. ప‌ల్లీల‌తో ఈ విధంగా చేసే ప‌ల్లి ప‌కోడాల‌ను అంద‌రూ ఎంతో ఇష్టంగా తింటారు.
