SS Rajamouli : రాజ‌మౌళి ద‌ర్శ‌క‌త్వంలో ఎన్‌టీఆర్‌, రామ్‌చ‌ర‌ణ్‌లు ప్ర‌ధాన పాత్ర‌ల్లో వ‌స్తున్న చిత్రం.. ఆర్ఆర్ఆర్. ఈ సినిమా ఈ నెల 25వ తేదీన ప్రేక్షకుల ముందుకు రానుంది. ఈ క్ర‌మంలోనే క‌ర్ణాట‌క‌లోని చిక్‌బ‌ల్లాపూర్‌లో ఈ సినిమా ప్రీ రిలీజ్ వేడుక‌ను శ‌నివారం సాయంత్రం ఘ‌నంగా నిర్వ‌హించారు. ఈ సంద‌ర్భంగా ద‌ర్శ‌కుడు రాజ‌మౌళి పాల్గొని మాట్లాడుతూ.. ప‌లు ఆస‌క్తిక‌ర‌మైన వ్యాఖ్య‌లు చేశారు.
ఈ కార్య‌క్ర‌మానికి క‌న్న‌డ ప‌వ‌ర్ స్టార్ పునీత్ రాజ్ కుమార్ అన్న శివ రాజ్‌కుమార్ హాజ‌రు కాగా.. ఆయ‌న‌ను ఉద్దేశించి రాజ‌మౌళి మాట్లాడుతూ.. పునీత్ నేడు మ‌ధ్య లేకపోయినా.. ఆయన ఆశీస్సులు మ‌నంద‌రికీ ఉన్నాయ‌ని అన్నారు. ఇక ఈ ఈవెంట్‌ను నిర్వ‌హించేందుకు స‌హ‌క‌రించిన క‌ర్ణాట‌క ప్ర‌భుత్వానికి రాజ‌మౌళి కృత‌జ్ఞ‌త‌లు తెలిపారు. అలాగే గ‌త కొద్ది రోజులుగా టాలీవుడ్‌లో నెల‌కొన్న స‌మ‌స్య‌ల‌ను ప‌రిష్క‌రించినందుకు రెండు రాష్ట్రాల ప్ర‌భుత్వాల‌కు, సీఎంల‌కు రాజ‌మౌళి కృత‌జ్ఞ‌త‌లు తెలిపారు.
ఈ సంద‌ర్బంగా రాజ‌మౌళి మెగాస్టార్ చిరంజీవిపై ప్ర‌శంస‌ల జ‌ల్లు కురిపించారు. టాలీవుడ్‌లో అనేక స‌మ‌స్య‌లు ఉంటే వాటిని చిరంజీవి ఓపిగ్గా ప‌రిష్క‌రించార‌ని అన్నారు. మ‌మ్మ‌ల్ని గెలిపించేందుకు ఆయన వెన‌క్కి త‌గ్గార‌ని అన్నారు. ఈ విషయంలో చిరంజీవికి చిత్ర ప‌రిశ్ర‌మ ఎల్ల‌ప్పుడూ రుణ ప‌డి ఉంటుంద‌ని అన్నారు.
ఇక టాలీవుడ్ స‌మ‌స్య‌ల‌ను ప‌రిష్క‌రించ‌డంలో ముందు నుంచి చొర‌వ చూపి తీవ్రంగా కృషి చేసిన చిరంజీవి.. నిజ‌మైన మెగాస్టార్ అని అన్నారు. ఆయన త‌న‌ను ఇండ‌స్ట్రీ పెద్ద‌గా పిలవ‌ద్ద‌ని.. ఇండ‌స్ట్రీ బిడ్డ‌గా మాత్ర‌మే చూడాల‌ని అన్నార‌ని.. అయితే ఆయన ముమ్మాటికీ ఇండ‌స్ట్రీ పెద్ద‌నే అని.. రాజ‌మౌళి అన్నారు. ఈ క్ర‌మంలోనే రాజ‌మౌళి వ్యాఖ్య‌లు సోష‌ల్ మీడియాలో వైర‌ల్ అవుతున్నాయి.
