చిత్త కార్తె కుక్క అనే వాడుకకు అర్ధం తెలుసుకునే ముందు, కార్తె అంటే ఏమిటో సంక్షిప్తంగా చెబుతాను. జ్యోతిషులు, వగైరాలు 27 నక్షత్రాల ఆధారంగా ఎలా జాతకాలు, పంచాగాలు వ్రాస్తారో, అలాగే మన రైతులు నక్షత్రాల ఆధారంగా వ్యవసాయ కాలాలు తద్వారా వ్యవసాయ పంచాంగాలు వ్రాసారు. ఆ కాలాలకు కార్తెల‌ను పేర్లు పెట్టారు. సూర్యుడు ఏ రకంగా అయితే రాశీ మండలాలలో ఉంటాడో అలాగే ఒక్కొక్క నక్షత్ర మండలంలోనూ ఉంటాడు. ఆలా ఉండే కాలాన్నే కార్తె అంటారు. ఏ కాలంలో సూర్యుడు ఏ నక్షత్రానికి ద‌గ్గరగా ఉంటాడో, ఆ కాలాన్ని ఆ కార్తెగా పిలిచేవారు. ఇలాంటి కార్తెలు 27 ఉన్నాయి. ఒక్కొక్క కార్తెకి నిర్దిష్టమైన వాతావరణం ఉంటుంది తదనుగుణంగా రైతులు వారి వారి వ్యవసాయ కార్యక్రమాలు చేసుకునేవారు.
ఇప్పుడు కార్తె అంటే అర్ధం అయ్యింది కదా.. చిత్త కార్తె అంటే తెలుసుకుందామని. కార్తెల వరుసలో 14వది అంటే చిత్తా నక్షత్రం ఉండే కాలాన్ని చిత్త కార్తె అంటారు. మన గ్రెగేరియన్ (అంటే వాడుకలో ఉన్న ఆంగ్ల) క్యాలెండరు ప్రకారం అక్టోబర్ నెలలో వస్తుంది. చిత్త కార్తె అంటే కూడా అర్ధం అయ్యింది కదా. ఇక పోతే సరిగ్గా ఇదే సమయములో కుక్కల్లో సంభోగం చేసే కోరిక ఉడుకు ఎక్కువుగా ఉంటుంది అని నమ్మకం. అలాగే నేను కూడా చాలా సార్లు గమనించాను. సంభోగ సమయములో ఈ ఉడుకు కుక్కలు కామ వాంఛతో ఆడ కుక్కల కొరకు వెంపర్లాడటం, కనిపించిన ఆడ కుక్క వెనుక వెళ్ళటం, అడ్డు వచ్చిన మొగ కుక్కలతో గొడవ పడటము జరుగుతుంది. అలానే పొరపాటున మనుష్యులు ఆ వైపుగా వెళ్లితే వాళ్ల పిక్క భక్షణం జరిగే ప్రమాదం కూడా ఉంది. ఇది వాటి సహజ నైజము.
కాబట్టి అమ్మాయిల వెంట పడుతూ, జుగుప్సాకరమైన ప్రవర్తన చేస్తూ, జులాయి లాగ గొడవలు పడే మొగ పిల్లలని చిత్త కార్తె కుక్క అని తిడతారు.
