Kadai Mushroom : మ‌న‌కు కాలానుగుణంగా దొరికే వాటిల్లో పుట్ట గొడుగులు కూడా ఒకటి. ఒక‌ప్పుడు ఇవి మ‌న‌కు కేవలం వ‌ర్షాకాలంలో మాత్రమే దొరికేవి. కానీ ప్ర‌స్తుత కాలంలో ఇవి ఏడాది పొడ‌వునా లభ్య‌మ‌వుతున్నాయి. పుట్ట గొడుగుల‌ను తిన‌డం వ‌ల్ల మన శ‌రీరానికి ఎంతో మేలు క‌లుగుతుంది. మన శ‌రీరానికి అవ‌స‌ర‌మ‌య్యే అనేక ర‌కాల విట‌మిన్స్, మిన‌ర‌ల్స్, పీచు ప‌దార్థాల‌తోపాటు ఇత‌ర పోష‌కాలు కూడా పుట్ట గొడుగుల్లో అధికంగా ఉంటాయి. వీటితో మ‌నం ర‌క‌ర‌కాల వంట‌ల‌ను త‌యారు చేస్తుంటాం. అందులో భాగంగా రెస్టారెంట్ స్టైల్ క‌డాయి మ‌ష్రూమ్ క‌ర్రీని ఎలా త‌యారు చేసుకోవాలి.. దీని త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
రెస్టారెంట్ స్టైల్ క‌డాయి మ‌ష్రూమ్ క‌ర్రీ త‌యారీకి కావ‌ల్సిన ప‌దార్థాలు..
త‌రిగిన పుట్ట గొడుగులు – 200 గ్రా., నూనె – రెండున్న‌ర టేబుల్ స్పూన్స్, జీడిప‌ప్పు ప‌లుకులు – ఒక టేబుల్ స్పూన్, వెల్లుల్లి రెబ్బ‌లు – 4, అల్లం – ఒక ఇంచు ముక్క, పెద్ద‌గా త‌రిగిన ఉల్లిపాయ – 1, పెద్ద ముక్క‌లుగా త‌రిగిన ట‌మాట – 1, ధ‌నియాలు – ఒక టీ స్పూన్, జీల‌క‌ర్ర – అర టీ స్పూన్, ఎండుమిర్చి – 4, మిరియాలు – అర టీ స్పూన్, దాల్చిన చెక్క ముక్కలు – 2 (చిన్నవి), ల‌వంగాలు – 2, యాల‌కులు – 2, పెటల్స్ లా త‌రిగిన ఉల్లిపాయ ముక్కలు – 10, పెటల్స్ లా త‌రిగిన క్యాప్సికం ముక్కలు – 10, ఉప్పు – త‌గినంత, సాజీరా – ఒక టీ స్పూన్, బిర్యానీ ఆకు – రెండు, త‌రిగిన ప‌చ్చి మిర్చి – 2, నీళ్లు – ఒక‌టిన్న‌ర క‌ప్పు, ప‌సుపు – పావు టీ స్పూన్, త‌రిగిన కొత్తిమీర – కొద్దిగా.
రెస్టారెంట్ స్టైల్ క‌డాయి మ‌ష్రూమ్ క‌ర్రీ త‌యారీ విధానం..
ముందుగా ఒక క‌ళాయిలో ధ‌నియాలు, జీల‌క‌ర్ర, ఎండు మిర్చి, మిరియాలు, దాల్చిన చెక్క, ల‌వంగాలు, యాల‌కులు వేసి దోర‌గా వేయించుకోవాలి. త‌రువాత వీట‌న్నింటిని ఒక జార్ లోకి తీసుకుని మెత్త‌గా మిక్సీ ప‌ట్టుకోవాలి. త‌రువాత అదే క‌ళాయిలో ఒక టేబుల్ స్పూన్ నూనె వేసి నూనె కాగిన త‌రువాత జీడిప‌ప్పు, వెల్లుల్లి రెబ్బ‌లు, అల్లం ముక్కలు, పెద్ద‌గా త‌రిగిన ఉల్లిపాయ, ట‌మాట వేసి కలపాలి. త‌రువాత క‌ళాయిపై మూత ఉంచి ట‌మాట ముక్కలు పూర్తిగా మెత్త‌గా అయ్యే వ‌ర‌కు వేయించి స్ట‌వ్ ఆఫ్ చేసి చ‌ల్ల‌గా అయ్యే వ‌ర‌కు ఉంచాలి.
త‌రువాత వీటిని కూడా ఒక జార్ లోకి తీసుకుని మెత్త‌గా పేస్ట్ లా చేసుకోవాలి. త‌రువాత అదే క‌ళాయిలో అర టేటుల్ స్పూన్ నూనె వేసి పెటల్స్ లా త‌రిగిన ఉల్లిపాయ ముక్క‌ల‌ను, క్యాప్సికం ముక్క‌ల‌ను, పుట్ట గొడుగు ముక్క‌ల‌ను వేసి క‌లిపి మూత పెట్టాలి. పుట్ట గొడుగులల్లో ఉండే నీరు అంతా పోయి అవి పూర్తిగా ఉడికే వ‌ర‌కు ఉంచి వాటిని కూడా ఒక ప్లేట్ లోకి తీసుకోవాలి. ఇప్పుడు అదే క‌ళాయిలో నూనె వేసి నూనె కాగిన త‌రువాత సాజీరా, ప‌చ్చి మిర్చి, బిర్యానీ ఆకు వేసి వేయించుకోవాలి. త‌రువాత ముందుగా మిక్సీ ప‌ట్టుకున్న ఉల్లిపాయ మిశ్ర‌మాన్ని, అర క‌ప్పు నీళ్ల‌ను పోసి క‌లిపి నూనె పైకి తేలే వ‌ర‌కు వేయించాలి.
త‌రువాత ముందుగా మిక్సీ ప‌ట్టుకున్న మ‌సాలా పొడిని, ప‌సుపును, ఉప్పును వేసి క‌లిపి ఒక నిమిషం పాటు వేయించాలి. త‌రువాత వేయించిన పుట్ట గొడుగు ముక్క‌ల‌ను వేసి కలపాలి. త‌రువాత ఒక క‌ప్పు నీళ్ల‌ను పోసి క‌లిపి మూత పెట్టాలి. వీటిని 5 నిమిషాల పాటు మ‌ధ్య‌స్థ మంట‌పై ఉడికించాలి. చివ‌ర‌గా కొత్తిమీర‌ను చ‌ల్లి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే రెస్టారెంట్ స్టైల్ క‌డాయి మ‌ష్రూమ్ క‌ర్రీ త‌యార‌వుతుంది. దీనిని అన్నం, చ‌పాతీ, రోటీ, పులావ్ వంటి వాటితో క‌లిపి తింటే ఎంతో రుచిగా ఉంటుంది. పైగా దీన్ని తిన‌డం వ‌ల్ల పుట్ట గొడుగుల్లో ఉండే పోషకాల‌ను కూడా పొంద‌వ‌చ్చు. ఇవి మ‌న‌ల్ని ఆరోగ్యంగా ఉంచుతాయి. ఇలా చేసిన క‌ర్రీని అంద‌రూ ఎంతో ఇష్టంగా తింటారు.
