ఇక నిద్రపోదాం అనేసుకుంటే నిద్ర రాదు. నిద్రని ఆహ్వానించాలి, అంటే నెమ్మదిగా మనం నిద్రకి సిద్ధమవ్వాలి. మీరు నిద్రపోవాలనుకున్న సమయానికి గంట ముందు నుండీ మీరు ఈ కార్యక్రమాన్ని చేపట్టాలి. మర్నాటికి బట్టలు రెడీ చేసుకోవడం, బ్రష్ చేసుకోవడం, ప్రేయర్ చేసుకోవడం వంటి పనులు మిమ్మల్ని నిద్రకి సిద్ధం చేస్తాయి. మరీ ముఖ్యంగా ఈ గంట మొదలయ్యేప్పుడే మీరు మీ ఫోన్ పక్కన పెట్టేయాలి. ఆదివారం, సోమవారంతో సంబంధం లేకుండా రోజూ ఒకే సమయానికి లేచే అలవాటు ఎంతో మేలు చేస్తుంది. ఇది అలవాటు అయిపోతే అసలు అలారమే అక్కరలేదు. ఇది అలవాటు అవ్వడానికి మాత్రం అలారం హెల్ప్ కావాలి. నిద్ర లేచేందుకు మాత్రమే కాదు, నిద్ర పోయేందుకు కూడా. మీరు ఏ టైమ్ నుండి నిద్ర కోసం ప్రిపరేషన్స్ మొదలు పెట్టబోతున్నారో ఆ టైమ్ కి అలారం పెట్టుకుంటే మర్చిపోకుండా ఉంటారు.
పొద్దున్న నిద్ర లేవగానే కర్టెన్స్ ఓపెన్ చేసేసి, ఇంట్లో నుండి బయటకి వచ్చి వెలుతురుని మీ ఇంట్లోకి ఆహ్వానించండి. వెలుతురు అంటే మెళ‌కువ అన్న విషయం మీ మెదడుకి అర్ధమవుతుంది. అలాగే, రాత్రి నిద్రకి ముందు నెమ్మదిగా ఇంట్లో లైట్స్ అన్నీ డిమ్ చేసుకుంటూ రండి. చీకటి గా ఉందంటే నిద్ర పోవాలి అన్న విషయం మీ మెదడు అర్ధం చేసుకుంటుంది. చివరగా అన్ని లైట్స్ ఆఫ్ చేసి నిద్రపోండి. రాత్రి బాత్రూమ్ కి వెళ్ళడానికి మీకు లైట్ అవసరం అనుకుంటే ఒక చిన్న బ్యాటరీ లైట్ మీ దగ్గర పెట్టుకోండి. మీ బెడ్ ని చక్కని నిద్రకి అనువుగా తయారు చేసుకోండి. చల్లగా ఉండే బెడ్రూమ్ లో మెత్తని బెడ్ షీట్స్, మీకు సౌకర్యంగా ఉండే దిండు, బెడ్రూమ్ గోడలకి తేలికపాటి రంగులు, కుదిరితే నైట్‌స్టాండ్ మీద తాజా పూలు.. వంటివి మీరు బెడ్రూమ్ లోకి అడుగు పెట్టగానే ఆవలింతలు వచ్చేలా చేస్తాయి.
బెడ్రూమ్ లో టీవీ చూడడం, చదువుకోవడం వంటి పనులు చేయకండి. బెడ్రూం మీరు నిద్ర పోవడానికీ, రొమాన్స్ ఎంజాయ్ చేయడానికీ మాత్రమే అని గుర్తు పెట్టుకోండి. నైట్ స్టాండ్ మీద ఫోన్ పెట్టుకునే అలవాటుకి కూడా స్వస్తి చెప్పండి. అలాగే, మీ ఆఫీసు వర్క్ కి కూడా బెడ్రూమ్ లోకి ప్రవేశం లేదు. రాత్రి పూట అందరం కొద్దిగా ఎక్కువే తింటాం. కబుర్లు చెప్పుకుంటూ పొద్దున విశేషాలు పంచుకుంటూ డిన్నర్ చేస్తారు చాలా మంది. ఇలా చేసినప్పుడు ఒక ముద్ద ఎక్కువే తింటాం, తప్పు లేదు. కానీ ఆ తరువాత మాత్రం ఇంకేం తినకూడదు. అలాగే, డిన్నర్ కీ నిద్రకీ మధ్య కనీసం రెండు గంటల సమయం ఉండాలి. అప్పుడే మీరు నిద్రపోయే సమయానికి పొట్టలో తేలికగా ఉండి హాయిగా నిద్రపడుతుంది. కాఫీ తాగి కప్పు పక్కన పెట్టి గుర్రు పెట్టి నిద్రపోయే వారి సంఖ్య చాలా తక్కువ, అలాంటి అదృష్టవంతుల్ని పక్కన పెట్టేద్దాం. మామూలు వాళ్ళందరికీ కాఫీ తాగిన వెంటనే నిద్ర పట్టడం కష్టం. కాబట్టి మధ్యాహ్నం తరువాత కెఫీన్ కి దూరంగా ఉండడం అవసరం.
కెఫీన్ అంటే కాఫీనే గుర్తొస్తుంది కానీ కొన్ని రకాల టీలు, సోడాలు, చాకొలేట్స్ లో కూడా కెఫీన్ ఉంటుంది. చెక్ చేసుకుని తాగడం అలవాటు చేసుకోండి. అలాగే, నిద్ర సమయానికి దగ్గర ఆల్కహాల్ కూడా తీసుకోకండి. ఆల్కహాల్ తీసుకున్న తరువాత నిద్ర పడుతుంది కానీ మధ్యలో మెలకువ వచ్చేస్తుంది, కాబట్టి ఈ అలవాటుని కూడా మార్చుకోండి. రాత్రి పూట ఒక డ్రింక్ మీకు కంపల్సరీ అయితే డిన్నర్ తో పాటు తీసుకోండి, మీరు నిద్రపోయే సమయానికి దాని ఎఫెక్ట్ తగ్గిపోతుంది. ఒక్క సారి ఇల్లంతా చూసి మీ ఇంట్లో ఎన్ని స్క్రీన్స్ ఉన్నాయో లెక్క పెట్టండి.. టీవీలు, స్మార్ట్ ఫోన్స్, ట్యాబ్లెట్స్, ల్యాప్‌టాప్స్.. వీటన్నింటికీ నిద్రకి గంట ముందు గుడ్ నైట్ చెప్పేయండి. ఆ తరువాత మీరు నిద్రకి సంబంధించిన ప్రిపరేషన్స్ మొదలు పెట్టండి. అలారం కూడా విడిగా కొనుక్కోండి, ఫోన్ లో అలారం పెట్టుకునే పద్ధతి వదిలేయండి.
పాదాలు చల్లగా అయిపోయి కొంత మందికి నిద్ర పట్టదు. అలాంటి వారు పడుకునే ముందు సాక్స్ వేసుకుని పడుకుంటే పాదాలు వెచ్చగా ఉంటాయి. సాక్స్ వేసుకోవడం ఇష్టం లేకపోతే పాదాల వరకూ దుప్పటి కప్పుకోండి. మీకు నిద్ర పట్టడం లేదనుకోండి. నిద్రకి సంబంధించిన పదాలన్నీ గుర్తు తెచ్చుకోండి. హాయి, ప్రశాంతత, గాఢ నిద్ర, కలలు, విశ్రాంతి వంటి పదాలు గుర్తు తెచ్చుకోండి, వెంటనే నిద్ర పట్టేస్తుంది. మీకు లెక్కలు అంటే ఇష్టమైతే మీరు ఇలా కూడా చేయవచ్చు, మూడు వందల నుండి వెనక్కి లెక్క పెట్టుకుంటూ రండి. ఇది ఎంత బోరింగ్ గా ఉంటుందంటే క్షణాల్లో నిద్ర పట్టేస్తుంది. ఇది వినటానికి విచిత్రంగా ఉంటుంది కానీ దిండు కింద రెండు వెల్లుల్లి రెమ్మలు పెట్టుకుని పడుకుంటే చాలా గాఢంగా నిద్ర పడుతుందట. వెల్లుల్లి లో ఉండే ఒక రకమైన రసాయనం దీనికి కారణమట. వెల్లుల్లి పొట్టుతో సహా దిండు కింద పెట్టుకుని చూడండి, ఎంత చక్కగా నిద్రపోతారో.
వీటన్నింటితో పాటూ చక్కని రొమాన్స్, మ్యూజిక్, పార్ట్నర్ తో ఉండే చిన్న చిన్న ఘర్షణలని బెడ్రూమ్ బయటే వదిలేయడం, డిన్నర్ తరువాత ఏదైనా పుస్తకం చదివే అలవాటు చేసుకోవడం (సస్పెన్స్, థ్రిల్లర్ కాదు సుమా) వంటివి చిన్న చిన్నవే కానీ నిద్ర యొక్క క్వాలిటీని పెంచుతాయి.
