చిన్న గిన్నెలు, ప్లేట్లు వాడుతూ తిండి తింటూంటే అధిక బరువు తగ్గించుకోవచ్చంటున్నారు సైకాలజిస్టులు. చాలామంది ఆహారం భుజించటమంటే…అట్టహాసంగా, పెద్ద పెద్ద ప్లేట్లు, అనేక రుచులు కల వివిధ ఆహారాల గిన్నెలు ఎన్నో ఎదురుగా పెట్టుకుని తినేస్తుంటారు. కాని అసలు ఎదురుగా పెట్టుకునే ఆహారపు గిన్నె, తినే ప్లేటు వంటివే చాలా చిన్నగా వుంటే, ఆ ఆహారం లోపలికి పోయే సమస్యే వుండదంటున్నారు కార్నెల్ యూనివర్శిటీకి చెందిన సైకాలజిస్టు బ్రియాన్ వాన్ సింక్.
వాన్ సింక్ పరిశోధనలను ఇతర స్టడీలు కూడా సమర్ధిస్తున్నాయి. తినే విషయంలో వలెనే, తాగే విషయంలో కూడా పెద్ద పెద్ద గ్లాసులు పెట్టుకొని ద్రవాలు తాగే కంటే, చిన్న గ్లాసులు పెట్టుకుని తాగితే తక్కువ పరిమాణంలో ద్రవాలు లోపలికి పోతాయంటున్నారు. పిల్లలు తినే ఆహరపు గిన్నె బరువు తగ్గాలనుకునే వారికి చాలట. అంతే కాక, తినేవారు ఎంత తినాలో తమకు తెలుసు అనుకుంటూనే అధికంగా తినేస్తుంటారని అందుకని, చిన్న ప్లేటు, గిన్నెలు వుంటే కొంతమేరకు వారి మానసిక స్ధితి కూడా మారుతుందని, డిన్నర్ ప్లేటుకు బదులు, ఒక సలాడ్ ప్లేట్ పెట్టుకుతింటే కొంత నియంత్రణ జరుగుతుందని వాన్ సింక్ చెపుతారు.
ఈ రకంగా చిన్నపాటి మార్పులు తినే ప్రదేశంలో చేసుకోవడం వలన కొంతమంది వ్యక్తులు ఒక నెలలోనే బరువు తగ్గటంలో గణనీయ అభివృధ్ధి సాధించినట్లు ఈ మానసికవేత్త వెల్లడించారు. ఈ పరిశోధనా ఫలితాలను అమెరికన్ సైకలాజికల్ అసోసియేషన్ 119వ వార్షిక సదస్సులో సమర్పించారు.
