డయాబెటీస్ వ్యాధి జీవన విధానం సరిగా లేని కారణంగా వస్తుంది. ఈ వ్యాధి బారిన పడటానికి సాధారణంగా మనం కలిగివుండే చెడు అలవాట్లు ఎలా వుంటాయో చూడండి. అతిగా పాలుత్రాగడం, పాల ఉత్పత్తులు భుజించడం. అతిగా చక్కెర ఉపయోగించడం, చక్కెర రసాలు త్రాగడం, క్రొత్తగా పండిన ధాన్యాలను, తెల్లని బియ్యాన్ని వంటలలో వాడడం, ఆల్కహాల్ వంటి మత్తు పానీయాలు సేవించడం, అతిగా నిద్ర పోవడం మరియు శరీరశ్రమ లేదా వ్యాయామం కావలసినంత చేయకపోవడం, మానసిక ఆందోళన, భారీ కాయం మరియు అతిగా తినే అహారపు అలవాట్లు వంటివి డ‌యాబెటిస్‌కు దారి తీస్తాయి.
ముందుగా తిన్నది జీర్ణంకాకముందే తిరిగి భుజించడం, ఆకలి లేకున్నా ఆహారం తీసుకోవడం, అతిగా ఆహారం తీసుకోవడం కూడా కార‌ణాలు అవుతాయి. తీపి పదార్థాలు, ఐస్‌క్రీములు తినటం మానుకోవాలి. స్వీట్లు వంటివి అపరిమితంగా తీసుకున్నప్పుడు అయితే, ఆరోజు మామూలుగా తీసుకునే ఆహార పదార్థాల మోతాదును బాగా తగ్గించాలి. అలాగే నూనె పదార్థాలు కూడా బాగా తగ్గించాలి. కొన్ని ప్రత్యేక పరిస్థితుల్లో శరీరంలో చక్కెర శాతం హఠాత్తుగా పెరిగిపోవచ్చు. అప్పుడు మాత్రలు ఆ స్థితిని అదుపు చేయలేకపోవచ్చు. అలాంటప్పుడు డాక్టర్‌ సూచిస్తే ఇన్సులిన్‌ తీసుకోవాలి. ఆ తరువాత చక్కెర అదుపులోకి వచ్చాక మళ్లీ మాత్రలకే పరిమితం కావచ్చు.
ఒకసారి ఇన్సులిన్‌ తీసుకుంటే జీవితాంతం ఇన్సులిన్‌ తీసుకోవలసి వస్తుందన్నది సరికాదు. ఆ కారణంగా ఇన్సులిన్‌ తీసుకోవడానికి వెనుకాడకూడదు. డయాబెటీస్ రోగులు పాదరక్షలు లేకుండా నడవకూడదు. పొగతాగడం పూర్తిగా మానుకోవాలి. మానసిక ఒత్తిళ్లను తగ్గించుకోవాలి. కొలెస్ట్రాల్‌ అధికంగా ఉండే కొవ్వు ఉన్న మాంసం, గుడ్లు తినడం మానుకోవాలి.
