Beerakaya Masala Curry : మ‌నం బీర‌కాయ‌ల‌ను కూడా ఆహారంగా తీసుకుంటూ ఉంటాము. బీర‌కాయ‌ల‌ను తీసుకోవ‌డం వ‌ల్ల కూడా మ‌నం అనేక ర‌కాల ఆరోగ్య ప్ర‌యోజ‌నాల‌ను పొంద‌వ‌చ్చు. బ‌రువు త‌గ్గ‌డంలో, జీర్ణ శ‌క్తిని మెరుగుప‌ర‌చ‌డంలో, కంటిచూపు పెరిగేలా చేయ‌డంలో, డ‌యాబెటిస్ ను నియంత్రించ‌డంలో ఇలా అనేక విధాలుగా బీరకాయ మ‌న ఆరోగ్యానికి మేలు చేస్తుంది. బీర‌కాయ‌తో చేసే కూర‌ల‌ను తిన‌డం వ‌ల్ల రుచితో పాటు ఆరోగ్యాన్ని కూడా పొంద‌వ‌చ్చు. బీర‌కాయ‌ల‌తో ర‌క‌ర‌కాల వంట‌కాల‌ను త‌యారు చేసుకుని తింటూ ఉంటాం. అందులో భాగంగా బీరకాయ మ‌సాలా కూర‌ను ఎలా త‌యారు చేసుకోవాలి.. త‌యారీకి కావల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
బీరకాయ మ‌సాలా క‌ర్రీ త‌యారీకి కావల్సిన ప‌దార్థాలు..
తరిగిన బీర‌కాయ‌లు – పావు కిలో, తరిగిన ట‌మాటాలు – 2, తరిగిన ఉల్లిపాయ – 1, తరిగిన ప‌చ్చిమిర్చి – 2, ఎండుకొబ్బ‌రి ముక్క‌లు – 2 టేబుల్ స్పూన్స్, అల్లం వెల్లుల్లి పేస్ట్ – ఒక టేబుల్ స్పూన్, నువ్వులు – ఒక టేబుల్ స్పూన్, దాల్చిన చెక్క – ఒక ఇంచు ముక్క, ల‌వంగాలు – 3, ధ‌నియాల పొడి – ఒక టేబుల్ స్పూన్, గ‌రం మ‌సాలా – ఒక టేబుల్ స్పూన్, ఉప్పు – త‌గినంత, కారం – ఒక టేబుల్ స్పూన్, ప‌సుపు – పావు టీ స్పూన్, నూనె – 2 టేబుల్ స్పూన్స్, తరిగిన కొత్తిమీర – కొద్దిగా, క‌రివేపాకు – ఒక రెమ్మ.
బీరకాయ మ‌సాలా క‌ర్రీ త‌యారీ విధానం..
ముందుగా ఒక జార్ లో ఎండు కొబ్బ‌రి ముక్క‌లు, నువ్వులు, ఉల్లిపాయ ముక్క‌లు, అల్లం వెల్లుల్లి పేస్ట్, దాల్చిన చెక్క, ల‌వంగాలు, కొద్దిగా నీళ్లు పోసి మెత్త‌ని పేస్ట్ గా చేసుకోవాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక ప‌చ్చిమిర్చి, క‌రివేపాకు వేసి వేయించాలి. త‌రువాత ట‌మాట ముక్క‌లు వేసి అవి మెత్త‌గా అయ్యే వ‌ర‌కు వేయించాలి. త‌రువాత బీరకాయ ముక్క‌లు వేసి నీళ్లూరే వ‌ర‌కు వేయించాలి. త‌రువాత మిక్సీ ప‌ట్టుకున్న మ‌సాలా పేస్ట్, ఉప్పు, కారం, ప‌సుపు, ధ‌నియాల పొడి, గ‌రం మ‌సాలా వేసి అంతా క‌లిసేలా బాగా క‌లుపుకోవాలి. త‌రువాత ఒక గ్లాస్ నీళ్లు పోసి క‌లిపి మూత పెట్టి 10 నిమిషాల పాటు ఉడికించాలి. త‌రువాత కొత్తిమీర‌ను చ‌ల్లి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే బీరకాయ మ‌సాలా క‌ర్రీ త‌యారవుతుంది. దీనిని అన్నం, చ‌పాతీ, రోటి వంటి వాటితో క‌లిపి తింటే చాలా రుచిగా ఉంటుంది. బీర‌కాయ‌ల‌తో త‌ర‌చూ చేసే వంట‌కాల‌తో పాటు ఇలా మ‌సాలా కూర‌ను కూడా త‌యారు చేసుకుని తిన‌వ‌చ్చు. ఈ కూర‌ను అంద‌రూ ఇష్టంగా తింటారు.
