Gongura Chicken Curry : గోంగూర చికెన్.. చాలా మంది గోంగూర చికెన్ ను రుచి చూసే ఉంటారు. గోంగూర, చికెన్ క‌లిపి చేసే ఈ క‌ర్రీ చాలా రుచిగా ఉంటుంది. అన్నం, బ‌గారా అన్నం, పులావ్ వంటి వాటితో తిన‌డానికి ఈ క‌ర్రీ చాలా రుచిగా ఉంటుంది. దీనిని అంద‌రూ ఇష్టంగా తింటార‌ని చెప్ప‌వ‌చ్చు. గోంగూర చికెన్ ను త‌యారు చేయ‌డం కూడా చాలా సుల‌భం. త‌రుచూ ఒకేర‌కం చికెన్ క‌ర్రీలు కాకుండా ఇలా వెరైటీగా కూడా త‌యారు చేసుకుని తిన‌వ‌చ్చు. అంద‌రికి న‌చ్చే విధంగా , రుచిగా, సుల‌భంగా ఈ గోంగూర చికెన్ ను ఎలా త‌యారు చేసుకోవాలో ఇప్పుడు తెలుసుకుందాం.
గోంగూర చికెన్ త‌యారీకి కావ‌ల్సిన ప‌దార్థాలు..
చికెన్ – అరకిలో, నూనె – 5 టేబుల్ స్పూన్స్, దాల్చిన చెక్క – ఒక ఇంచు ముక్క, ల‌వంగాలు – 5, యాల‌కులు – 4, జీలకర్ర – ఒక టీస్పూన్, బిర్యానీ ఆకులు – 2, త‌రిగిన ఉల్లిపాయ ముక్క‌లు – ఒక క‌ప్పు, త‌రిగిన ప‌చ్చిమిర్చి – 3, అల్లం వెల్లుల్లి పేస్ట్ – ఒక టేబుల్ స్పూన్, ప‌సుపు – పావు టీ స్పూన్, కారం – 3 టీ స్పూన్స్, ఉప్పు – త‌గినంత, ధ‌నియాల పొడి – ఒక టీ స్పూన్, గోంగూర ఆకులు -2 క‌ప్పులు, గ‌రం మ‌సాలా – అర టీ స్పూన్.
గోంగూర చికెన్ త‌యారీ విధానం..
ముందుగా క‌ళాయిలో నూనె వేసి వేడి చేయాలి. నూనె వేడ‌య్యాక మ‌సాలా దినుసులు, జీలకర్ర వేసి వేయించాలి. త‌రువాత ఉల్లిపాయ ముక్క‌లు, ప‌చ్చిమిర్చి వేసి వేయించాలి. ఇవి వేగిన త‌రువాత అల్లం వెల్లుల్లి పేస్ట్ వేసి వేయించాలి. ఇవ‌న్నీ వేగిన త‌రువాత ప‌సుపు వేసి క‌ల‌పాలి. త‌రువాత చికెన్ ను వేసి క‌ల‌పాలి. దీనిని 3 నిమిషాల పాటు వేయించిన త‌రువాత కారం, ఉప్పు, ధ‌నియాల పొడి వేసి క‌ల‌పాలి. త‌రువాత మూత పెట్టి మ‌ధ్య మ‌ధ్య‌లో క‌లుపుతూ చికెన్ ను ఉడికించాలి. చికెన్ ఉడికిన త‌రువాత మ‌రో క‌ళాయిలో ఒక టీస్పూన్ నూనె వేసి క‌ల‌పాలి. త‌రువాత గోంగూర ఆకులు వేసి క‌ల‌పాలి. గోంగూర పూర్తిగా వేగిన త‌రువాత స్ట‌వ్ ఆఫ్ చేసి దీనిని ఉడుకుతున్న చికెన్ లో వేసి క‌ల‌పాలి.
అంతా క‌లిసేలా క‌లుపుకున్న త‌రువాత మూత పెట్టి నూనె పైకి తేలే వ‌ర‌కు ఉడికించాలి. ఇలా ఉడికించిన త‌రువాత గ‌రం మ‌సాలా, మ‌రో టీ స్పూన్ ధ‌నియాల పొడి వేసి క‌ల‌పాలి. దీనిని మ‌రో నిమిషం పాటు ఉడికించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే గోంగూర చికెన్ త‌యార‌వుతుంది. దీనిని అంద‌రూ ఎంతో ఇష్టంగా తింటారు. అన్నంతో, చ‌పాతీ వంటి వాటితో తింటే ఈ చికెన్ చాలా రుచిగా ఉంటుంది.
