Mango Papad : వేసవికాలం వచ్చిందంటే మనకు మార్కెట్లో మామిడి పండ్లు దర్శనమిస్తాయి. మామిడి పండ్లతో వివిధ రకాల వంటలను తయారు చేసుకొని తింటుంటారు. ఈ క్రమంలోనే కొందరు జ్యూస్ లు, పచ్చడిలు చేసుకుంటారు. అయితే ఈ మామిడి పండ్లతో పాపడ్ తయారుచేసుకుని తింటే ఎంతో రుచికరంగా ఉంటాయి. ఈ మ్యాంగో పాపడ్ తినడానికి పిల్లల నుంచి పెద్దవారి వరకు ఎంతో ఇష్టపడుతుంటారు. మరి మ్యాంగో పాపడ్ ఏవిధంగా తయారు చేసుకోవాలో ఇక్కడ తెలుసుకుందాం.
మ్యాంగో పాపడ్ త‌యారీకి కావలసిన పదార్థాలు..
బాగా పండిన మామిడికాయ గుజ్జు – ఒక కప్పు, చక్కెర – అర కప్పు, నెయ్యి – మూడు టేబుల్ స్పూన్లు, మిరియాల పొడి – టేబుల్ స్పూన్.
మ్యాంగో పాపడ్ తయారీ విధానం..
ముందుగా నెయ్యిని మూడు పెద్ద ప్లేట్లకు రాసి పక్కన పెట్టుకోవాలి. ఇప్పుడు స్టవ్ మీద పాన్ పెట్టి అందులోకి మామిడి గుజ్జు, పంచదార వేసుకొని చిన్న మంటపై బాగా కలియబెడుతూ ఉండాలి. ఈ మిశ్రమంలో నీరు వేయకుండా ఈ మిశ్రమం మొత్తం దగ్గర పడేవరకు కలియబెడుతూ ఉండాలి. ఈ విధంగా ఈ మిశ్రమంలో మిరియాల పొడి వేసి మిశ్రమం మొత్తం దగ్గరకు రాగానే స్టవ్ ఆఫ్ చేసుకోవాలి. స్టవ్ ఆఫ్ చేసిన వెంటనే ఈ మిశ్రమాన్ని ముందుగా నెయ్యి రాసి పెట్టుకున్న ప్లేట్లలో వేసి ప్లేట్ మొత్తం సమాంతరంగా ఉండేలా చూసుకోవాలి. పదిహేను నిమిషాల తర్వాత ఈ మిశ్రమం చల్లారగానే దీనిని ముక్కలుగా కట్ చేసుకుని సర్వ్ చేసుకుంటే ఎంతో అద్భుతంగా రుచి ఉంటుంది.
