మన శరీరానికి అవసరం అయ్యే అనేక రకాల మినరల్స్లో అయోడిన్ కూడా ఒకటి. ఇది సూక్ష్మ పోషకం. అంటే దీన్ని నిత్యం మనం తక్కువ మొత్తంలో తీసుకోవాల్సి ఉంటుందన్నమాట. అయోడిన్ వల్ల మనకు అనేక లాభాలు కలుగుతాయి. దీన్ని మన శరీరం నిత్యం ఉపయోగించుకుంటుంది.
మన శరీరంలో థైరాయిడ్ గ్రంథి ఆరోగ్యంగా ఉండేందుకు, ఆ గ్రంథి సరిగ్గా పనిచేసేందుకు అయోడిన్ అవసరం. అలాగే గర్భంలో ఉన్న శిశువు నాడీ మండల వ్యవస్థ ఎదుగుదలకు, పుట్టే పిల్లలు సరైన బరువును కలిగి ఉండేందుకు, స్త్రీలలో వక్షోజాల సంబంధిత సమస్యలు రాకుండా ఉండాలన్నా, బాక్టీరియా, వైరస్ల నుంచి మనకు రక్షణ కల్పించేందుకు.. అయోడిన్ అవసరం అవుతుంది. అందువల్ల ఇది ఉండే ఆహారాలను నిత్యం తీసుకోవాల్సి ఉంటుంది.
శరీరంలో అయోడిన్ లోపిస్తే మెడ దగ్గర వాపు కనిపిస్తుంది. థైరాయిడ్ గ్రంథి వాపునకు గురై టచ్ చేస్తే నొప్పి అనిపిస్తుంది. శ్వాస తీసుకోవడంలో, నిద్రించడంలో ఇబ్బందులు వస్తాయి. మింగడం కష్టమవుతుంది. తీవ్రమైన అలసట ఉంటుంది. సాధారణ ఉష్ణోగ్రత ఉన్నప్పటికీ బాగా చలిగా ఉన్నట్లు అనిపిస్తుంది. వెంట్రుకలు రాలిపోతుంటాయి. డిప్రెషన్ వస్తుంది. అధికంగా బరువు పెరుగుతారు.
పైన తెలిపిన లక్షణాలు కనిపిస్తే అయోడిన్ లోపం ఉన్నట్లు గుర్తించాలి. ఏమాత్రం ఆలస్యం చేయకుండా వైద్యున్ని సంప్రదించి పరీక్షలు చేయించుకుని ఆ మేరకు చికిత్స తీసుకోవాలి. అయోడిన్ లోపం ఉంటే వైద్యులు సప్లిమెంట్లు ఇస్తారు. అయితే అయోడిన్ ను నిత్యం మోతాదుకు మించి తీసుకుంటే సైడ్ ఎఫెక్ట్స్ వస్తాయి. వికారంగా, వాంతికి వచ్చినట్లు ఉంటుంది. విరేచనాలు అవుతాయి. జ్వరం వస్తుంది. గొంతు, నోరు మండినట్లు అనిపిస్తుంది. కడుపులో నొప్పి ఉంటుంది. అయోడిన్ సప్లిమెంట్లను వాడేవారు ఆయా లక్షణాలను ఎప్పటికప్పుడు గమనించాలి. తేడా అనిపిస్తే డాక్టర్ను సంప్రదించాలి.
క్రాన్ బెర్రీలు, ఆలుగడ్డలు (బంగాళాదుంపలు), స్ట్రాబెర్రీలు, మొక్కజొన్న, ప్రూన్స్, అరటి పండ్లు, బీన్స్, పాలకూర, కొబ్బరినూనె, బ్రొకొలి, హిమాలయన్ సాల్ట్, సోంపు గింజల ఆకు, సముద్రపు ఉప్పు, అయోడైజ్డ్ సాల్ట్, సముద్రపు చేపలు, పెరుగు, కోడిగుడ్లు, టర్కీ మాంసం తదితర ఆహారాల్లో మనకు అయోడిన్ సమృద్ధిగా లభిస్తుంది. వీటిని తరచూ తీసుకోవడం వల్ల అయోడిన్ లోపం రాకుండా ఉంటుంది.