కమెడియన్ సునీల్ గురించి ప్రత్యేకంగా చెప్పనవసరం లేదు. టాలీవుడ్ ఇండస్ట్రీలో ఎంతోమంది కమెడియన్లలో స్టార్ కమెడియన్ గా గుర్తింపు తెచ్చుకున్న వారిలో సునీల్ ఒకరు. ఇండస్ట్రీలోకి అడుగుపెట్టేముందు ఎవరు ఎన్ని కష్టాలు పడ్డా.. ఇండస్ట్రీలోకి వచ్చిన తర్వాత ఒక క్రేజ్ వచ్చిందంటే ఇక అవన్నీ వారు మర్చిపోతూ, సక్సెస్ ఎంజాయ్ చేసే ప్రయత్నంలోనే ఉంటారని చెప్పవచ్చు. ఇక ఈ క్రమంలోనే సునీల్ కూడా ఒకప్పుడు ఎన్నో కష్టాలు పడి ఆ తర్వాత కమెడియన్ గా ఒక వెలుగు వెలిగి ఆ తర్వాత హీరోగా తన కెరీర్ ను మార్చుకున్నాడు. అంతేకాక విలన్ గా, కెరీర్ ప్రారంభంలో అసిస్టెంట్ డైరెక్టర్ గా పలు సినిమాలలో పనిచేశాడు సునీల్. తన కామెడీ టైమింగ్ తో ఎమ్మెస్ నారాయణ, బ్రహ్మానందం వంటి సీనియర్ స్టార్ కమెడియన్స్ ని కూడా సైడేశాడు అనడంలో సందేహం లేదు.
నువ్వే కావాలి సినిమా ద్వారా కమెడియన్ గా ఇండస్ట్రీ లోకి అడుగుపెట్టిన సునీల్.. ఆ తర్వాత హీరోగా కూడా మారి మర్యాద రామన్న, పూలరంగడు వంటి పలు హిట్లు అందుకున్నాడు. అయితే కొత్త హీరోల ఎంట్రీ వల్ల.. అలాగే కామెడీ సినిమాలకు డిమాండ్ తగ్గిపోవడంతో తర్వాత సునీల్ కు హీరోగా వర్కౌట్ కాలేదు. దాంతో మళ్లీ ఇప్పుడు కమీడియన్ గా మారి సినిమాలు చేస్తున్నాడు. అయితే సునీల్ ను ఎన్నో సినిమాలలో చూసిన తెలుగు ఆడియన్స్.. తన ఫ్యామిలీని మాత్రం ఎప్పుడూ చూడలేదు. సునీల్ కూడా వారికి సంబంధించిన ఫోటోలను ఎప్పుడూ సోషల్ మీడియాలో షేర్ చేయలేదు. అయితే సునీల్ కి సంబంధించిన కొన్ని ఆసక్తికర విషయాలను ఇప్పుడు తెలుసుకుందాం. సునీల్ సొంత ఊరు ఆంధ్ర ప్రదేశ్ లోని పశ్చిమగోదావరి జిల్లాకు చెందిన భీమవరం.
సునీల్ తన తండ్రిని ఐదు సంవత్సరాల వయసులోనే కోల్పోయాడు. దీంతో తల్లి సంరక్షణలో పెరిగి పెద్దయ్యాడు. ఇక సునీల్ కి దర్శకుడు త్రివిక్రమ్ శ్రీనివాస్ మంచి స్నేహితుడు అన్న విషయం తెలిసిందే. అతని ప్రోత్సాహంతోనే ఇండస్ట్రీలోకి అడుగు పెట్టాడు. ఇక ఇండస్ట్రీలోకి వచ్చిన కొద్ది రోజులకే సునీల్ వివాహం జరిగింది. వారి బంధువుల అమ్మాయిని పెళ్లి చేసుకున్న సునీల్ భార్య పేరు శృతి ఇందుకూరి. ఇక సునీల్ కు ఇద్దరు పిల్లలు. వారు ఒక పాప ఒక బాబు. ఇక పుష్ప సినిమాలో మంగళం శ్రీను పాత్రలో విలన్ గా నటించి సునీల్ మంచి పేరుని తెచ్చుకున్నాడు. దీంతోపాటు పలు చిన్న చిత‌కా సినిమాల్లోనూ సునీల్ కమెడియన్ క‌మ్ విలన్ రోల్స్ చేస్తూ అల‌రిస్తున్నాడు.
