Chicken Fry : చికెన్ పేరు చెప్ప‌గానే మాంసాహారుల నోళ్ల‌లో నీళ్లూర‌తాయి. చికెన్ అంటే అంత‌టి ఇష్టం ఉంటుంది. అందుక‌ని చికెన్‌ను చాలా మంది ఇష్టంగా తింటుంటారు. దీంతో అనేక ర‌కాల వెరైటీల‌ను చేస్తుంటారు. వాటిల్లో చికెన్ ఫ్రై ఒక‌టి. అయితే కాస్త శ్ర‌మించాలే కానీ.. ఇంట్లోనే చాలా సులభంగా చికెన్ ఫ్రై ని అదిరిపోయే టేస్ట్‌తో వండుకోవ‌చ్చు. మ‌రి చికెన్ ఫ్రై ని ఎలా వండాలో ఇప్పుడు తెలుసుకుందామా..!
చికెన్ ఫ్రై త‌యారీకి కావ‌ల్సిన ప‌దార్థాలు..
చికెన్ – కిలో, త‌రిగిన ఉల్లిపాయ‌లు – 3 (మ‌ధ్య‌స్థంగా ఉన్న‌వి), ప‌సుపు – అర టీ స్పూన్, ధ‌నియాలు – ఒక‌టిన్న‌ర టేబుల్ స్పూన్స్‌, మిరియాలు – ఒక టేబుల్ స్పూన్, వెల్లుల్లి రెబ్బ‌లు – 10, అల్లం ముక్క‌లు- కొద్దిగా, ల‌వంగాలు – 5, దాల్చిన చెక్క ముక్క‌లు – 2 (చిన్న‌వి), పొడుగ్గా త‌రిగిన ప‌చ్చి మిర్చి – 4, ఉప్పు – రుచికి సరిప‌డా, కారం – ఒక టీ స్పూన్, క‌చ్చా ప‌చ్చాగా చేసిన వెల్లుల్లి రెబ్బ‌లు – 6, క‌రివేపాకు రెబ్బ‌లు – 2, నూనె – 3 టేబుల్ స్పూన్స్‌, త‌రిగిన కొత్తిమీర – కొద్దిగా.
చికెన్ ఫ్రై త‌యారీ విధానం..
ముందుగా చికెన్ ను శుభ్రంగా క‌డిగి నీళ్లు లేకుండా చేసుకోవాలి. ఇప్పుడు క‌ళాయిలో ధ‌నియాల‌ను వేసి వేయించుకుని, జార్ లో వేసుకుని పొడిలా చేసుకుని ప‌క్క‌న పెట్టుకోవాలి. అదే జార్ లో మిరియాల‌ను వేసి బ‌ర‌క‌గా చేసి దీనిని కూడా ప‌క్క‌న పెట్టుకోవాలి. మ‌ళ్లీ అదే జార్ లో అల్లం, వెల్లుల్లి రెబ్బ‌లు, ల‌వంగాలు, దాల్చి చెక్క ముక్క‌లు వేసి క‌చ్చా ప‌చ్చ‌గా మిక్సీ ప‌ట్టుకోవాలి. ఇప్పుడు ఒక క‌ళాయిలో ఒక టేబుల్ స్పూన్ నూనె వేసి కాగాక క‌డిగిన చికెన్ ను, త‌రిగిన ఉల్లిపాయ ముక్క‌ల‌ను, ప‌సుపు, కొద్దిగా ఉప్పు, ఒక రెబ్బ క‌రివేపాకును వేసి క‌లిపి మ‌ధ్య‌స్థ మంట‌పై.. మూత పెట్టి చికెన్ ను ఉడికించుకోవాలి. త‌రువాత మ‌రో క‌ళాయిలో నూనె వేసి కాగాక త‌రిగిన ఉల్లిపాయ ముక్క‌లు, 2 త‌రిగిన ప‌చ్చి మిర్చి, క‌రివేపాకు వేసి వేయించుకోవాలి.
ఉల్లిపాయ‌లు కొద్దిగా వేగాక ముందుగా ఉడికించుకున్న చికెన్ ను వేసి మ‌ధ్య‌స్థ మంట‌పై చికెన్ ముక్క‌లు ఎర్ర‌గా అయ్యే వ‌ర‌కు వేయించుకోవాలి. త‌రువాత ముందుగా మిక్సీ ప‌ట్టుకున్న అల్లం, వెల్లుల్లి పేస్ట్ వేసి కలుపుకోవాలి. త‌రువాత కారం, క‌చ్చా ప‌చ్చాగా చేసిన వెల్లుల్లి రెబ్బ‌లు, త‌రిగిన ప‌చ్చి మిర్చి వేసి కలుపుకోవాలి. త‌రువాత ముందుగా చేసి పెట్టుకున్న ధ‌నియాల పొడిని, మిరియాల పొడిని వేసి కలుపుకోవాలి. చివ‌ర‌గా త‌రిగిన కొత్తిమీర వేసి స్ట‌వ్ ఆఫ్ చేసుకోవాలి. దీంతో ఎంతో రుచిగా ఉండే చికెన్ ఫ్రై త‌యార‌వుతుంది. దీనిని నేరుగా లేదా ప‌ప్పు, సాంబార్ వంటి వాటితో క‌లిపి తింటే ఎంతో రుచిగా ఉంటుంది.
