Banana Milkshake : మనం అరటిపండ్లను కూడా ఆహారంగా తీసుకుంటూ ఉంటాం. చాలా మంది వీటిని ఇష్టంగా తింటారు. దీనిలో ఎన్నో ఆరోగ్య ప్రయోజనాలు దాగి ఉన్నాయి. శరీరానికి కావల్సిన శక్తిని అందించడంలో, జీర్ణశక్తి ని మెరుగుపరచడంలో, ఒత్తిడిని తగ్గించడంలో, చర్మ ఆరోగ్యాన్ని మెరుగుపరచడంలో ఇలా అనేక రకాలుగా అరటి పండు మనకు సహాయపడుతుంది. దీనిని నేరుగా తినడంతో పాటు మం ఎంతో రుచిగా ఉండే బనానా మిల్క్ షేక్ ను కూడా తయారు చేసుకోవచ్చు. వేసవికాలంలో చల్ల చల్లగా రుచిగా ఉండే బనానా మిల్క్ షేక్ ను తయారు చేసుకుని తాగడం వల్ల ఆరోగ్యానికి ఎంతో మేలు కలుగుతుంది. రుచిగా, చల్లగా, కమ్మగా పిల్లలు మరింత ఇష్టపడేలా బనానా మిల్క్ షేక్ ను ఎలా తయారు చేసుకోవాలి.. అన్న వివరాలను ఇప్పుడు తెలుసుకుందాం.
బనానా మిల్క్ షేక్ తయారీకి కావల్సిన పదార్థాలు..
అరటిపండ్లు – 4, హార్లిక్స్ పౌడర్ – 5 టేబుల్ స్పూన్స్, ఐస్ క్యూబ్స్ – తగినన్ని, కాచి చల్లార్చిన పాలు – అర లీటర్, వెనీలా ఐస్ క్రీమ్ – అర కప్పు.
బనానా మిల్క్ షేక్ తయారీ విధానం..
ముందుగా అరటి పండ్లను ముక్కలుగా కట్ చేసుకుని జార్ లోకి తీసుకోవాలి. తరువాత ఇందులో హార్లిక్స్ పౌడర్, ఐస్ క్యూబ్స్, కొద్దిగా పాలు పోసి మెత్తగా మిక్సీ పట్టుకోవాలి. తరువాత ఐస్ క్రీమ్ మరికొద్దిగా పాలు పోసి మరోసారి మిక్సీ పట్టుకోవాలి. తరువాత మిగిలిన పాలు కూడా పోసి కలుపుకుని గ్లాస్ లోకి తీసుకోవాలి. తరువాత దీనిపై మరి కొద్దిగా ఐస్ క్రీమ్ వేసుకోవాలి. అలాగే కొద్దిగా హార్లిక్స్ పౌడర్ చల్లుకోవాలి. ఇలా చేయడం వల్ల ఎంతో రుచిగా చల్ల చల్లగా ఉండే హార్లిక్స్ పౌడర్ తయారవుతుంది. దీనిని పిల్లలు ఎంతో ఇష్టంగా తాగుతారు. అవసరం అనుకున్న వారు దీనిలో మరికొద్దిగా పంచదారను కూడా వేసుకోవచ్చు. ఈ విధంగా ఇంట్లోనే బనానా మిల్క్ షేక్ ను తయారు చేసుకుని తాగడం వల్ల రుచితో పాటు ఆరోగ్యాన్ని కూడా పొందవచ్చు.
