కలబందతో ఊరగాయ, లడ్డూలను ఇలా తయారు చేసుకోండి.. వాటిని తింటే మేలు జరుగుతుంది..!

కలబంద వల్ల మనకు ఎన్ని ఆరోగ్యకరమైన ప్రయోజనాలు కలుగుతాయో అందరికీ తెలిసిందే. కలబందలో ఎన్నో ఔషధ గుణాలు ఉంటాయి. అందువల్ల దీన్ని ఆయుర్వేదంలో ఎక్కువగా ఉపయోగిస్తారు. అనేక ఔషధాలను దీంతో తయారు చేస్తారు. అయితే కలబందతో లడ్డూలు, ఊరగాయలు తయారు చేసుకుని తినవచ్చు. వీటితో కూడా ఆరోగ్యకరమైన ప్రయోజనాలను పొందవచ్చు. మరి వాటిని ఎలా తయారు చేసుకోవాలో ఇప్పుడు తెలుసుకుందామా..!

కలబంద లడ్డూల తయారీ

చిన్న కలబంద లేత కొమ్మల గుజ్జు ముక్కలు 500 గ్రాములు, ఇంట్లో తయారు చేసుకున్న గోధుమ పిండి 1కేజీ తీసుకోవాలి. ఈ రెండింటినీ విడివిడిగా దేశవాళీ ఆవు నెయ్యిలో దోర ఎరుపు రంగు వచ్చే వరకు చిన్నమంటపై వేయించి సిద్ధం చేసుకోవాలి.

తరువాత బంకలాగా ఉన్న పాత బెల్లం కానీ లేక మేలు రకమైన తాటి బెల్లం కానీ ఒకటిన్నర కేజీ తీసుకుని కళాయి పాత్రలో వేసి చిన్న మంటపైన పాకం పట్టాలి. లేత పాకం రాగానే అందులో పైన వేయించి పెట్టుకున్న కలబంద గుజ్జును గోధుమ పిండి వేసి బాగా కలగలిపి దించుకోవాలి. పదార్థం వేడి తగ్గి గోరు వెచ్చగా అయిన తరువాత 25 గ్రాముల మోతాదుగా లడ్డూలను కట్టి ఆరిన తరువాత గాజు సీసాలో నిల్వ చేసుకోవాలి.

ఈ లడ్డూలను తినడం వల్ల ఎన్నో లాభాలు కలుగుతాయి. ముఖ్యంగా ఎంతో కాలం నుంచి భరించలేనంత కీళ్లవాతంతో, నడుము నొప్పులతో, మూత్రం అతికష్టంగా వచ్చే సమస్యతో బాధపడేవారు వ్యాధి తీవ్రతను బట్టి రెండు పూటలా ఒకటి లేదా రెండు లడ్డులనూ తింటుండాలి. దీంతో ఆయా సమస్యలు తగ్గుతాయి.

కలబంద ఊరగాయ తయారీ

చిన్న కలబంద లేత కొమ్మలను తీసుకుని రెండు వైపులా ఉండే ముళ్లు తీసేసి కొమ్మలను చిన్న ముక్కలుగా తరిగినవి అయిదున్నర కేజీలు తీసుకోవాలి. వాటిని కళాయి పాత్రలో వేసి తగినంత దేశవాళీ ఆవు నెయ్యి వేసి దోరగా వేయించాలి. ఆ తరువాత ఆ ముక్కల్లో సరిపడేంత ఉప్పు వేసి కలియబెట్టి జాడీలో నింపి మూత పెట్టి రెండు రోజుల పాటు ఆ పాత్రను ఎండలో ఉంచాలి. మధ్య మధ్యలో గరిటతో పదార్థాన్ని కిందకి పైకి కలుపుతుండాలి.

ధనియాలు, పసుపు, శొంటి, జీలకర్ర, నల్ల జీలకర్ర ఒక్కొక్కటి 100 గ్రాముల మోతాదుగా చూర్ణం చేయాలి. అలాగే మిరియాల పొడి 120 గ్రాములు, నెయ్యితో పొంగించిన ఇంగువ 50 గ్రాములు, పిప్పళ్ల పొడి 75 గ్రాములు, వాము పొడి 200 గ్రాములు, దాల్చిన చెక్క, లవంగాలు, అక్కలకర్ర, చిన్న యాలకులు ఒక్కొక్కటి 50 గ్రాములు, చిన్న కరక్కాయల పొడి 150 గ్రాములు, సన్న ఆవాల పొడి 150 గ్రాములు తీసుకుని అన్నింటినీ పైన తయారైన కలబంద ముక్కల్లో వేసి బాగా కలిపి మూత పనెట్టి ఎండలో ఉంచాలి. పదార్థాలు బాగా కలిసిన తరువాత భద్ర పరుచుకోవాలి. ఇదే కలబంద ఊరగాయ పచ్చడి.

ఈ పచ్చడిని అన్నం లేదా రొట్టెలతో తినవచ్చు. దీంతో అన్ని రకాల జీర్ణ సమస్యలు, వాత, కఫ, వికారాలు తగ్గుతాయి. ఆరోగ్యంగా ఉంటారు.