మన చుట్టూ పరిసరాల్లో బంతి పూల మొక్కలు ఎక్కువగా పెరుగుతాయి. బంతిపూలను సహజంగానే అలంకరణలకు, పూజల్లోనూ ఉపయోగిస్తారు. అయితే ఆయుర్వేద పరంగా ఈ మొక్కలో ఎన్నో ఔషధ గుణాలు ఉంటాయ. ఈ మొక్క పువ్వులు, ఆకులతో పలు అనారోగ్య సమస్యలను నయం చేసుకోవచ్చు. వాటి వల్ల ఎలాంటి ప్రయోజనాలు కలుగుతాయో ఇప్పుడు తెలుసుకుందాం.
1. బంతి పువ్వు ఒకటి, కొన్ని ఆకులను సేకరించి దంచి రసం తీయాలి. దాన్ని గాయాలు, పుండ్లపై రాసి కట్టు కట్టాలి. ఇలా రోజూ చేస్తుంటే గాయాలు, పుండ్లు త్వరగా తగ్గుతాయి.
2. ఆయాసంగా ఉన్నవారు బంతి పూలను ఉపయోగిస్తే ఫలితం ఉంటుంది. బంతిపూల మధ్యలో ఉండే తెల్లని బొడ్లను సేకరించి ఎండబెట్టి పొడి చేయాలి. దాన్ని తియ్యని పెరుగు, చక్కెరలతో కలిపి తినాలి. దీంతో ఆయాసం తగ్గుతుంది.
3. బంతి పువ్వుల రసం లేదా బంతి పూల ముద్దను వెన్న లేదా నెయ్యిలో వేయించి తీసుకుంటుండాలి. దీంతో నోట్లో నుంచి రక్తం పడడం, అర్శమొలలు, ఎర్రబట్ట వంటి సమస్యలు తగ్గుతాయి.
4. బంతి పువ్వులు, ఆకులను సేకరించి వాటిని దంచి రసం తీయాలి. దాన్ని 2 టీస్పూన్ల మోతాదులో తీసుకుని అందులో కొద్దిగా యహూద్‌ భస్మాన్ని కలిపి రోజుకు రెండు సార్లు తీసుకోవాలి. దీంతో కిడ్నీ స్టోన్లు కరిగిపోతాయి. యాహూద్‌ భస్మం ఆయుర్వేద మందుల షాపుల్లో లభిస్తుంది.
5. బంతి పువ్వుల రెక్కలు 1 కిలో, బంతి ఆకుల రసం 1 లీటర్, నువ్వుల నూనె అర లీటర్ తీసుకుని వీటిని ఒక పాత్రలో వేసి మీడియం మంటపై కషాయంలా కాయాలి. ఈ క్రమంలో నీరు ఆవిరి అయ్యే వరకు మరిగించాలి. తరువాత ఏర్పడే తైలాన్ని సేకరించి సీసాలో నిల్వ చేయాలి. దీన్ని కీళ్లపై రాస్తుంటే కీళ్ల నొప్పులు తగ్గుతాయి. తలపై రాస్తే తలనొప్పి తగ్గుతుంది. చెవిలో రెండు చుక్కలు వేస్తే చెవి నొప్పి తగ్గుతుంది. చర్మంపై ఏర్పడే కురుపులపై రాస్తే కురుపులు తగ్గుతాయి.
6. బంతి పువ్వుల రెక్కలకు తగినంత ఉప్పు, జీలకర్ర, కరివేపాకుల పొడిని కలిపి నెయ్యితో కొద్దిగా వేయించి తీసుకుంటే వేడి తగ్గుతుంది. మలద్వారం నుంచి రక్తం పడడం తగ్గుతుంది. మూత్రమార్గాల్లో ఉండే రాళ్లు పోతాయి. పైత్యం, వికారం తగ్గుతాయి.
7. బంతి పువ్వుల రెక్కలు, బంతి మొక్క లేత ఆకులను సేకరించి మిరియాల గింజలతో కలిపి నూరి నీళ్లతో తీసుకుంటే మూత్రంలో వచ్చే చీము తగ్గుతుంది.
8. బంతి పువ్వులను పది గ్రాముల మోతాదులో తీసుకుని శుభ్రమైన మట్టి పెంకుల మీద కాల్చి 10 గ్రాముల ఆవు నెయ్యి, చిటికెడు పచ్చ కర్పూరాన్ని కలిపి బాగా మర్దించి ఉంచుకోవాలి. దీన్ని కంటికి కాటుక మాదిరిగా పెట్టుకుంటే కంటి దురద, అలర్జీలు, కళ్ల నుంచి నీరు కారడం, కళ్ల మంట తగ్గుతాయి.
9. బంతి పువ్వుల గింజల పొడిలో సమాన భాగం చక్కెర కలిపి ఒక టీస్పూన్‌ మోతాదులో తీసుకుంటే అతి కామోద్రేకం తగ్గుతుంది. మనస్సు ప్రశాంతంగా మారుతుంది.
10. ఒక కిలో బంతి పువ్వులను కలాయిలో వేసి అందులో రెండు లీటర్ల నీరు పోసి ఒక రోజు ఉంచి అర్క యంత్రం ద్వారా అర్కం తీసి (డిస్టిలేషన్‌) సీసాలో నిల్వ చేసుకోవాలి. దీన్ని ఒక టీస్పూన్‌ మోతాదులో సమాన భాగం నీళ్లు కలిపి తీసుకుంటే రక్త వికారాలు, అర్శ మొలలు, హస్త పాదాల్లో మంటలు తగ్గుతాయి.
