నేటి త‌రుణంలో మ‌న‌కు ఆధార్ కార్డ్ ఎంత అవసరం ఉంటుందో అంద‌రికీ తెలిసిందే. గుర్తింపు కార్డుగానే కాక, ప‌లు కేంద్ర, రాష్ట్ర ప్ర‌భుత్వ ప‌థ‌కాల్లో ఆధార్ క‌చ్చితంగా అవసరం అవుతోంది. దీంతో ఆ కార్డును ఎల్ల‌ప్పుడూ ద‌గ్గ‌ర ఉంచుకోవాల్సి వ‌స్తోంది. అయితే అలా ఒరిజిన‌ల్ కార్డును ద‌గ్గ‌ర ఉంచుకుంటే అనుకోకుండా ఒక వేళ అది పోవ‌డ‌మో లేదంటే చిర‌గ‌డ‌మో జ‌రిగితే ఇక దాంతో ఇబ్బందులు త‌ప్ప‌వు. మ‌ళ్లీ కొత్త కార్డు పొందాల్సి ఉంటుంది. ఇదంతా ఓ పెద్ద త‌తంగంలా అనిపిస్తుంది. అయితే ఈ బాధంతా ప‌డ‌కుండా ఉండాలంటే ఏం చేయాలి..? అని అడ‌గ‌బోతున్నారా..? అయితే దానికి స‌మాధాన‌మే ఈ పీవీసీ కార్డ్స్‌..!
మీ ద‌గ్గ‌ర ఉన్న ఆధార్ కార్డును పీవీసీ కార్డ్ రూపంలో ప్రింట్ తీసుకుంటే ఇక ఒరిజిన‌ల్‌తో ప‌నిలేదు. ఆ పీవీసీ కార్డును ద‌గ్గ‌ర పెట్టుకుంటే చాలు. ఎప్పుడు కావాలంటే అప్పుడు జిరాక్స్ తీసుకుని ఉప‌యోగించుకోవ‌చ్చు. అయితే పీవీసీ కార్డ్ రూపంలో ఆధార్‌ను ప్రింట్ చేసుకోవాలంటే అందుకు బ‌య‌ట‌కి ఎక్క‌డికో వెళ్లాల్సిన ప‌ని లేదు. ఎంచ‌క్కా మీ ఆధార్ కార్డ్ ని https://eaadhaar.uidai.gov.in/ అనే సైట్ లో యాక్సెస్ చేసి దాని ద్వారా పీవీసీ కార్డ్‌ను ఆర్డ‌ర్ చేయ‌వ‌చ్చు. అదెలాగో ఇప్పుడు చూద్దాం.
https://eaadhaar.uidai.gov.in/ వెబ్‌సైట్‌లోకి వెళ్లి అందులో ఉండే ఆధార్ పీవీసీ అనే ఆప్ష‌న్‌ను ఎంచుకోవాలి. అనంత‌రం అక్క‌డ మీ ఆధార్ నంబర్, మొబైల్ నంబర్ త‌దిత‌ర వివ‌రాల‌ను ఎంట‌ర్ చేయ‌మ‌ని అడుగుతుంది. అక్క‌డ ఆ వివ‌రాల‌ను ఎంట‌ర్ చేసిన త‌రువాత మీ రిజిస్ట‌ర్డ్ ఫోన్ నంబ‌ర్‌కు ఒక ఓటీపీ వ‌స్తుంది. దాన్ని వెరిఫై చేయాలి. అనంత‌రం పేమెంట్ చేయాల్సి ఉంటుంది. దీంతో మీ ఆధార్ పీవీసీ కార్డు ఆర్డ‌ర్ అయిపోతుంది. ఈ కార్డు మీకు వారం రోజుల్లోగా స్పీడ్ పోస్టులో ఇంటికి డెలివ‌రీ అవుతుంది. ఇలా మీరు మీ ఆధార్ పీవీసీ కార్డును ఆన్‌లైన్‌లో సుల‌భంగా ఆర్డ‌ర్ చేయ‌వ‌చ్చు.
