Aloo Garlic Fry : మ‌నం బంగాళాదుంప‌ల‌తో ర‌క‌ర‌కాల వంట‌కాల‌ను త‌యారు చేసుకుని తింటూ ఉంటాం. బంగాళాదుంప‌ల‌తో చేసే వంట‌కాల‌ను తిన‌డం వ‌ల్ల రుచితో పాటు ఆరోగ్యాన్ని కూడా పొంద‌వ‌చ్చు. బంగాళాదుంప‌ల‌తో చేసుకోద‌గిన వంట‌కాల్లో బంగాళాదుంప ఫ్రై ఒక‌టి. దీనిని పిల్ల‌ల‌తో స‌హా అంద‌రూ ఇష్టంగా తింటారు. ఈ బంగాళాదుంప ఫ్రై లో కారం పొడి, వెల్లుల్లి రెబ్బలు వేసి మ‌నం మ‌రింత రుచిగా కూడా చేసుకోవ‌చ్చు. ఈ విధంగా చేసిన ఫ్రై కూడా చాలా రుచిగా ఉంటుంది. వెల్లుల్లి రెబ్బలు వేసి మ‌రింత రుచిగా బంగాళాదుంప ఫ్రైను ఎలా త‌యారు చేసుకోవాలో ఇప్పుడు తెలుసుకుందాం.
ఆలూ గార్లిక్ ఫ్రై త‌యారీకి కావ‌ల్సిన ప‌దార్థాలు..
చిన్న ముక్క‌లుగా త‌రిగిన బంగాళాదుంప‌లు – అర కిలో, ప‌సుపు – అర టీ స్పూన్, నూనె – ఒక టేబుల్ స్పూన్, ఉప్పు – త‌గినంత, క‌రివేపాకు – ఒక రెమ్మ, త‌రిగిన ప‌చ్చిమిర్చి – 2.
మసాలా దినుసులు..
ప‌ల్లీలు – 2 టేబుల్ స్పూన్స్, ధ‌నియాలు – ఒక టేబుల్ స్పూన్, శ‌న‌గ‌ప‌ప్పు – ఒక టేబుల్ స్పూన్, జీల‌క‌ర్ర – ఒక టీ స్పూన్, మెంతులు – పావు టీ స్పూన్, ఎండు కొబ్బ‌రి – రెండు ఇంచుల ముక్క, వెల్లుల్లి రెబ్బలు – 12, ఎండుమిర్చి – 6, నువ్వులు – ఒక టీ స్పూన్.
ఆలూ వెల్లుల్లి ఫ్రై త‌యారీ విధానం..
ముందుగా కళాయిలో ప‌ల్లీలు, ధ‌నియాలు, జీల‌క‌ర్ర, మెంతులు, శ‌న‌గ‌ప‌ప్పు, ఎండు కొబ్బ‌రి ముక్క‌లు వేసి వేయించాలి. త‌రువాత నువ్వులు, ఎండుమిర్చి వేసి వేయించాలి. ఈ దినుసుల‌న్నీ చ‌ల్లారిన త‌రువాత వాటిని జార్ లోకి తీసుకోవాలి. ఇందులోనే వెల్లుల్లి రెబ్బలు కూడా వేసి బ‌ర‌క‌గా మిక్సీ ప‌ట్టుకుని ప‌క్క‌కు ఉంచాలి. ఇప్పుడు కళాయిలో నూనె వేసి వేడి చేయాలి. నూనె వేడ‌య్యాక బంగాళాదుంప‌లు వేసి వేయించాలి. వీటిని మ‌ధ్య‌స్థ మంట‌పై క‌లుపుతూ క‌ర‌క‌రలాడే వ‌ర‌కు వేయించాలి. బంగాళాదుంప ముక్క‌లు వేగిన త‌రువాత ప‌చ్చిమిర్చి, క‌రివేపాకు, మిక్సీ ప‌ట్టుకున్న పొడి, ఉప్పు, ప‌సుపు వేసి క‌ల‌పాలి. దీనిని మ‌రో 5 నిమిషాల పాటు క‌లుపుతూ వేయించి స్ట‌వ్ ఆఫ్ చేసుకోవాలి.
ఇలా చేయ‌డం వ‌ల్ల ఎంతో రుచిగా ఉండే ఆలూ గార్లిక్ ఫ్రై త‌యార‌వుతుంది. దీనిని అన్నం, చ‌పాతీ, పుల్కా వంటి వాటితో తిన‌వ‌చ్చు. అలాగే ప‌ప్పు, సాంబార్ వంటి వాటితో సైడ్ డిష్ గా కూడా తిన‌వ‌చ్చు. బంగాళాదుంప‌ల‌తో త‌ర‌చూ చేసే వంట‌కాల‌తో పాటు అప్పుడ‌ప్పుడూ ఇలా ఫ్రైను కూడా త‌యారు చేసుకుని తిన‌వ‌చ్చు. ఈ ఫ్రైను అంద‌రూ ఎంతో ఇష్టంగా తింటారు.
