Snake Island : సాధారణంగా దీవి అంటే అద్భుతమైన ప్రకృతి రమణీయతకు అద్దం పడుతుంది. సుందరమైన బీచ్‌లు, ఆహ్లాదకరమైన వాతావరణం బీచ్‌లో ఉంటుంది. కానీ ఆ దీవి పేరు చెబితే చాలు.. ఎవరైనా భయపడాల్సిందే. ఎందుకంటే ఆ దీవి నిండా పాములే. అడుగు తీసి అడుగు పెట్టలేం. ఇంతకీ ఏంటా దీవి ? ఎక్కడ ఉంది ? అంటే..
బ్రెజిల్‌లోని సావో పౌలో సిటీకి 90 మైళ్ల దూరంలో Ilha de Queimada Grande అనే దీవి ఉంది. దీన్నే స్నేక్‌ ఐల్యాండ్‌ అని కూడా పిలుస్తారు. ఎందుకంటే ఈ దీవిలో అన్నీ పాములే ఉంటాయి. ప్రతి మూడు అడుగుల దూరానికి ఒక పాము కనిపిస్తుంది. సాధారణంగా మనకు బయట కనిపించే పాముల కన్నా ఈ దీవిలో ఉండే పాములకు మూడు నుంచి ఐదు రెట్ల విషం ఎక్కువగా ఉంటుంది. ఇక ఈ దీవిలో గోల్డెన్‌ లాన్స్‌హెడ్‌ అనే ఓ రకానికి చెందిన పాము ఉంటుంది. దీని విషం ఎంతటి ప్రమాదకరం అంటే.. అది ఏకంగా మన చర్మాన్ని కరిగిస్తుంది. అంతటి పవర్‌ ఉంటుంది.
మరి ఇన్ని పాములు ఉన్న ఆ దీవిలో మనుషులు ఎవరూ ఉండరా ? అంటే.. ఉండేవారు. అది 1920లలో. అప్పట్లో ఈ దీవి సమీపంలో ఉన్న భూభాగానికి ఆనుకుని ఉండేది. కానీ సముద్ర మట్టం పెరిగి ఈ దీవి ఆ భూభాగం నుంచి విడిపోయింది. దీంతో ఈ దీవిలో మనుషులు నివాసం ఉండేవారు కాదు. ఆ తరువాత అక్కడ పాముల సంఖ్య గణనీయంగా పెరిగింది. కానీ అప్పట్లో ఈ దీవిలో ఉన్న లైట్‌ హౌజ్‌కు దగ్గర్లో ఓ ఇంట్లో ఓ కుటుంబం నివాసం ఉండేది. వారు పాములు కుట్టడం వల్ల రాత్రికి రాత్రే అందరూ చనిపోయారు. దీంతో అప్పటి నుంచి ఈ దీవికి ఎవరూ వెళ్లడం లేదు.
అయితే లైట్‌ హౌజ్‌ మెయింటెనెన్స్‌ కోసం అప్పుడప్పుడు నేవీ వారు అత్యంత జాగ్రత్తగా ఈ దీవికి వస్తుంటారు. అలాగే సైంటిస్టులు కూడా ఈ దీవిలోని పాములపై పరిశోధనలు చేసేందుకు కూడా ఈ దీవికి ప్రత్యేక అనుమతితో వస్తుంటారు. అందువల్ల ఈ దీవికి ఎవర్నీ వెళ్లనివ్వడం లేదు.
ఇక ఈ దీవిలో ప్రపంచంలోని పలు అరుదైన రకాలకు చెందిన అత్యంత విషపూరితమైన పాములు కూడా కొన్ని ఉన్నాయి. ఆ విషం చాలా ప్రమాదకరమైంది. దాంతో మనిషి చనిపోయే అవకాశాలు ఎక్కువగా ఉంటాయి. ఈ దీవి విస్తీర్ణం 43 హెక్టార్లు మాత్రమే కాగా.. ఇందులో సుమారుగా 4000 వరకు పాములు ఉన్నట్లు అంచనా వేస్తున్నారు.
కాగా పైన తెలిపిన గోల్డెన్‌ లాన్స్‌హెడ్‌ అనే పాముకు చెందిన విషాన్ని కొన్ని లక్షల రూపాయలకు విక్రయిస్తున్నారు. ఈ విషంతో గుండె జబ్బులు నయం చేయవచ్చని చెబుతున్నారు. అయితే ఈ పాముల సంఖ్య రాను రాను తగ్గిపోతోంది. కానీ ఈ దీవిలో ఉన్న ఇతర పాముల సంఖ్య మాత్రం బాగా పెరుగుతుందని చెబుతున్నారు. ఏది ఏమైనా ఈ దీవిని తలచుకుంటే ఒళ్లు జలదరిస్తుంది కదా..!
