Tomato Cashew Nuts Masala Curry : మ‌న‌కు రెస్టారెంట్ ల‌లో ల‌భించే వివిధ ర‌కాల మ‌సాలా కూర‌ల‌ల్లో ట‌మాట కాజు మ‌సాలా కర్రీ కూడా ఒక‌టి. ఎక్కువ‌గా రోటి, బ‌ట‌ర్ నాన్ వంటి వాటిని ఈ కూర‌తో తింటూ ఉంటారు. ట‌మాట కాజు మ‌సాలా కర్రీ చాలా రుచిగా ఉంటుంది. దీనిని మ‌న‌లో చాలా మంది రుచి చూసే ఉంటారు. ఈ కూర‌ను అచ్చం అదే రుచితో మ‌నం ఇంట్లో కూడా త‌యారు చేసుకోవ‌చ్చు. ఈ కూర‌ను త‌యారు చేయ‌డం చాలా తేలిక. రుచిగా, లొట్ట‌లేసుకుంటూ తినేంత రుచిగా ఉండే ఈ ట‌మాట కాజు మ‌సాలా క‌ర్రీని ఎలా త‌యారు చేసుకోవాలి.. త‌యారీకి కావల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
ట‌మాట కాజు మ‌సాలా కర్రీ త‌యారీకి కావల్సిన ప‌దార్థాలు..
ట‌మాటాలు – 4, త‌రిగిన ట‌మాటాలు – 2, చిన్న‌గా త‌రిగిన పెద్ద ఉల్లిపాయ – 1, త‌రిగిన ప‌చ్చిమిర్చి – 4, జీడిప‌ప్పు – 2 టేబుల్ స్పూన్స్, అల్లం వెల్లుల్లి పేస్ట్ – ఒక టేబుల్ స్పూన్, జీల‌క‌ర్ర పొడి – అర టీ స్పూన్, ధ‌నియాల పొడి – ఒక టేబుల్ స్పూన్, గ‌రం మ‌సాలా – ఒక టీ స్పూన్, కారం – ఒక టేబుల్ స్పూన్, నూనె – 2 టేబుల్ స్పూన్స్, ఉప్పు – త‌గినంత, ప‌సుపు – అర టీ స్పూన్, క‌సూరి మెంతి – ఒక టీ స్పూన్, క‌రివేపాకు – ఒక రెమ్మ, త‌రిగిన కొత్తిమీర – కొద్దిగా.
మ‌సాలా దినుసులు..
నువ్వులు – 2 టీ స్పూన్స్, జీడిప‌ప్పు – ఒక టేబుల్ స్పూన్, సార ప‌ప్పు – ఒక టేబుల్ స్పూన్, యాల‌కులు – 2, దాల్చిన చెక్క – ఒక ఇంచు ముక్క, ల‌వంగాలు – 2.
ట‌మాట కాజు మ‌సాలా కర్రీ త‌యారీ విధానం..
ముందుగా మ‌సాలా దినుసుల‌ను ఒక గిన్నెలోకి తీసుకోవాలి. త‌రువాత ఇందులో పావు గ్లాస్ నీళ్లు పోసి మెత్త‌గా మిక్సీ ప‌ట్టుకుని గిన్నెలోకి తీసుకోవాలి. త‌రువాత ట‌మాటాల‌ను కూడా జార్ లో వేసి ఫ్యూరీలాగా చేసుకోవాలి. ఇప్పుడు క‌ళాయిలో నూనె వేసి వేడి చేయాలి. నూనె వేడ‌య్యాక జీడిప‌ప్పు వేసి వేయించాలి. దీనిని రంగు మారే వ‌ర‌కు వేయించి ప్లేట్ లోకి తీసుకోవాలి. త‌రువాత అదే నూనెలో ఉల్లిపాయ ముక్క‌లు వేసి వేయించాలి. త‌రువాత అల్లం వెల్లుల్లి పేస్ట్, ట‌మాట ఫ్యూరీ, ఉప్పు, ప‌సుపు, కారం, జీల‌క‌ర్ర పొడి, ధ‌నియాల పొడి, గ‌రం మ‌సాలా వేసి కలపాలి. త‌రువాత మిక్సీ ప‌ట్టుకున్న మ‌సాలా పేస్ట్ వేసి కలపాలి.
ఇప్పుడు దీనిని నూనె పైకి తేలే వ‌ర‌కు వేయించాలి. మ‌సాలా చ‌క్క‌గా వేగిన త‌రువాత ట‌మాట ముక్క‌లు, ఒక గ్లాస్ నీళ్లు పోసి కలపాలి. త‌రువాత దీనిపై మూత పెట్టి 15 నిమిషాల పాటు ఉడికించాలి. త‌రువాత దీనిలో వేయించిన జీడిప‌ప్పు, క‌సూరి మెంతి, క‌రివేపాకు, ప‌చ్చిమిర్చి, కొత్తిమీర వేసి కలపాలి. దీనిని మ‌రో మూడు నిమిషాల పాటు ఉడికించి స్ట‌వ్ ఆఫ్ చేసుకోవాలి. ఇలా చేయ‌డం వల్ల ఎంతో రుచిగా ఉండే ట‌మాట కాజు మ‌సాలా కర్రీ త‌యార‌వుతుంది. దీనిని అన్నం, చ‌పాతీ, రోటీ, పుల్కా, నాన్, పులావ్, బిర్యానీ వంటి వాటితో క‌లిపి తింటే చాలా రుచిగా ఉంటుంది. ఈ ట‌మాట కాజు మ‌సాలా కూర‌ను అంద‌రూ ఎంతో ఇష్టంగా తింటారు.
