Chicken Masala Curry : చికెన్ మసాలా కర్రీ.. చికెన్ తో చేసుకోదగిన రుచికరమైన వంటకాల్లో ఇది కూడా ఒకటి. చికెన్ మసాలా కర్రీ చాలా రుచిగా ఉంటుంది. అన్నం, చపాతీ, రోటీ, నాన్ వంటి వాటితో తింటే ఈ కర్రీ మరింత రుచిగా ఉంటుంది. అలాగే కేజి చికెన్ తో కూర వండాలనుకునే వారు కింద చెప్పిన విధంగా మసాలా కర్రీని తయారు చేసుకుని తినవచ్చు. ఈ చికెన్ కర్రీని తయారు చేయడం చాలా సులభం. అలాగే చాలా తక్కువ ఎవరైనా ఈ కర్రీని సులభంగా తయారు చేసుకోవచ్చు. తిన్నా కొద్ది తినాలనిపించేంత రుచిగా ఉండే చికెన్ మసాలా కర్రీని ఎలా తయారు చేసుకోవాలో ఇప్పుడు తెలుసుకుందాం.
చికెన్ మసాలా కర్రీ తయారీకి కావల్సిన పదార్థాలు..
చిన్నగా తరిగిన ఉల్లిపాయలు – 5, టమాటాలు – 3, నూనె – 4 టేబుల్ స్పూన్స్, యాలకులు- 3, బిర్యానీ ఆకు – 1, నల్ల యాలక్కాయ – 1, లవంగాలు – 3, దాల్చిన చెక్క – ఒక ఇంచు ముక్క, జీలకర్ర – ఒక టీ స్పూన్, కచ్చా పచ్చాగా దంచిన వెల్లుల్లి రెబ్బలు – 8, తరిగిన పచ్చిమిర్చి – 3, అల్లం వెల్లుల్లి పేస్ట్ – రెండున్నర టీ స్పూన్స్, ఉప్పు – తగినంత, పసుపు – పావు టీ స్పూన్, కాశ్మీరి చిల్లీ కారం – రెండు టీ స్పూన్స్, వేడినీళ్లు – ఒక గ్లాస్, చికెన్ మసాలా – ఒకటిన్నర టీ స్పూన్, తరిగిన కొత్తిమీర – కొద్దిగా.
![Chicken Masala Curry : 1 కేజీ చికెన్తో మసాలా కర్రీని ఇలా చేయండి.. రుచి అదిరిపోతుంది..! Chicken Masala Curry recipe in telugu make like this](https://i0.wp.com/ayurvedam365.com/wp-content/uploads/2023/09/chicken-masala-curry.jpg?resize=1200%2C675&ssl=1)
మ్యారినేషన్ కు కావల్సిన పదార్థాలు..
చికెన్ – కిలో, ఉప్పు – ఒకటిన్నర టీ స్పూన్, పసుపు – అర టీ స్పూన్, కారం – 2 టీ స్పూన్స్, ధనియాల పొడి – 2 టీ స్పూన్స్, జీలకర్ర – అర టీ స్పూన్, పెరుగు – 100 గ్రా..
చికెన్ మసాలా కర్రీ తయారీ విధానం..
ముందుగా గిన్నెలో చికెన్ ను తీసుకుని అందులో మ్యారినేషన్ కు కావల్సిన పదార్థాలు వేసి చేత్తో బాగా కలపాలి. తరువాత చికెన్ పై మూత పెట్టి గంటపాటు మ్యారినేట్ చేసుకోవాలి. తరువాత టమాట ముక్కలను జార్ లో వేసి మెత్తగా పేస్ట్ లాగా చేసుకోవాలి. తరువాత కుక్కర్ లో నూనె వేసి వేడి చేయాలి. నూనె వేడయ్యాక మసాలా దినుసులు, జీలకర్ర వేసి వేయించాలి. తరువాత తరువాత వెల్లుల్లి రెబ్బలు, పచ్చిమిర్చి వేసి వేయించాలి. తరువాత ఉల్లిపాయ ముక్కలు వేసి ఎర్రగా అయ్యే వరకు వేయించాలి. ఇలా వేయించిన తరువాత అల్లం వెల్లుల్లి పేస్ట్ వేసి పచ్చి వాసన పోయే వరకు వేయించాలి. తరువాత టమాట ఫేస్ట్, ఉప్పు, కారం,పసుపు వేసి కలపాలి. దీనిని నూనె పైకి తేలే వరకు వేయించిన తరువాత చికెన్ వేసి కలపాలి.
దీనిని రెండు నిమిషాల పాటు వేయించిన తరువాత కొత్తిమీర వేసి కలపాలి. తరువాత మూత పెట్టి మధ్య మధ్యలో కలుపుతూ 10 నిమిషాల పాటు వేయించాలి. ఇలా వేయించిన తరువాత వేడి నీళ్లు పోసి కలపాలి. తరువాత కుక్కర్ మూత పెట్టి 2 విజిల్స్ వచ్చే వరకు ఉడికించి స్టవ్ ఆఫ్ చేసుకోవాలి. తరువాత కుక్కర్ మూత తీసి మరలా స్టవ్ ఆన్ చేసుకోవాలి. ఇందులో చికెన్ మసాలా వేసి మరో రెండు నిమిషాల పాటు ఉడికించాలి. చివరగా కొత్తిమీరను చల్లుకుని స్టవ్ ఆఫ్ చేసుకోవాలి. ఇలా చేయడం వల్ల చికెన్ మసాలా కర్రీ తయారవుతుంది. దీనిని దేనితో తిన్నా కూడా చాలా రుచిగా ఉంటుంది. ఈవిధంగా తయారు చేసిన చికెన్ మసాలా కర్రీని అందరూ ఎంతో ఇష్టంగా తింటారు.