Healthy Foods : మనం తినే ఆహార పదార్థాల వల్లే మనకు అనారోగ్య సమస్యలు వస్తుంటాయి. కనుక రాత్రి పూట మనం తినే ఆహారాల విషయంలో జాగ్రత్త వహించాలి. రాత్రి పూట ఏయే ఆహారాలను తినాలి, వేటిని తినకూడదు ? అన్న వివరాలను ఇప్పుడు తెలుసుకుందాం.
రాత్రి పూట ఆహారంలో జంక్ ఫుడ్, నూనె పదార్థాలు, ఫ్రాజెన్ ఫుడ్, మాంసాహారం, బాగా కొవ్వు ఉన్న పదార్థాలను అస్సలు తినకూడదు. లేదంటే వాటి వల్ల అనారోగ్య సమస్యలు తలెత్తుతాయి. ప్రధానంగా దగ్గు, జలుబు వంటి సమస్యలు ఉన్నవారు ముందు చెప్పిన ఆహారాన్ని రాత్రి పూట అస్సలు తినకూడదు. లేదంటే జీర్ణ సంబంధ సమస్యలు వస్తాయి. అలర్జీలు వ్యాపిస్తాయి.
రాత్రి పూట ఆహారంలో పెరుగుకు బదులుగా మజ్జిగను తీసుకోవాలి. అదేవిధంగా అన్నంకు బదులుగా చపాతీలను తినాలి. అవి కూడా తగ్గించి తినాలి. లేదంటే ఎక్కువ ఆహారం వల్ల జీర్ణం ఆలస్యమై గ్యాస్, అసిడిటీ, మలబద్దకం వంటి సమస్యలు వస్తాయి. దీంతోపాటు రాత్రి పూట వీలైనంత వరకు ఉప్పును తగ్గించి తినాలి. లేదంటే మానేయాలి. ఒక వేళ ఉప్పు ఉన్న పదార్థాలను రాత్రి పూట ఎక్కువగా తింటే శరీరంలోకి నీరు ఎక్కువగా వస్తుంది.
ఆకుపచ్చని కూరగాయలను రాత్రి పూట ఎక్కువగా తినాలి. ఇవి జీర్ణ ప్రక్రియను మెరుగు పరుస్తాయి. వీటితోపాటు అల్లం వంటి పదార్థాలను కలుపుకుని తింటే దాంతో శరీరానికి రాత్రి పూట కావల్సిన వేడి అందుతుంది. రాత్రి పూట చక్కెరకు బదులుగా తేనె వాడాలి. చల్లని పాలు తాగరాదు. కొవ్వు తక్కువగా ఉన్న, కొవ్వు తీసిన పాలు తాగవచ్చు. ఇవి సులభంగా జీర్ణమవుతాయి.
పైన చెప్పిన పదార్థాల్లో వేటిని తిన్నా బాగా తక్కువ మొత్తంలో తినాలి. వీలైనంత వరకు కడుపును చాలా వరకు ఖాళీగా ఉంచాలి. దీని వల్ల జీర్ణ సంబంధ సమస్యలు రావు. అంతేకాదు, రాత్రి భోజనం తరువాత కనీసం 3 గంటలు ఆగి నిద్రపోవాలి. దీంతో నిద్ర చక్కగా పడుతుంది.
రాత్రి పూట మన శరీరానికి చాలా తక్కువ మొత్తంలో శక్తి అవసరం అవుతుంది. అందుకని కొంత ఆహారం మాత్రమే తింటే చాలు. అదే ఆహారం ఎక్కువైతే అందులో శక్తికి పోను మిగిలినదంతా కొవ్వు కింద మారి శరీరంలో నిల్వ ఉంటుంది. ఇది మనకు హాని కలిగిస్తుంది. స్థూలకాయం, గుండె జబ్బులు, మధుమేహం వంటి వ్యాధులకు కారణమవుతుంది.