Mokkajonna Vadalu : మ‌నం మొక్కజొన్న కంకుల‌ను కూడా ఆహారంగా తీసుకుంటూ ఉంటాం. వీటిని ఎక్కువ‌గా ఉడికించి లేదా కాల్చుకుని తింటూ ఉంటాం. మొక్క‌జొన్న‌ల‌ను ఆహారంగా తీసుకోవ‌డం వల్ల మ‌న ఆరోగ్యానికి ఎంతో మేలు క‌లుగుతుంద‌న్న సంగ‌తి మ‌న‌కు తెలిసిందే. వీటిలో మ‌న శరీరానికి అవ‌స‌ర‌మ‌య్యే ఎన్నో పోష‌కాలు ఉంటాయి. వీటిని తిన‌డం వల్ల మ‌నం చ‌క్క‌టి ఆరోగ్యాన్ని సొంతం చేసుకోవ‌చ్చు. కాల్చుకుని తిన‌డంతో పాటు ఈ మొక్కజొన్న గింజ‌ల‌తో మ‌నం ఎంతో రుచిగా ఉండే వ‌డ‌ల‌ను కూడా తయారు చేసుకోవ‌చ్చు. మొక్కజొన్న వ‌డ‌లు చాలా రుచిగా ఉంటాయి. పైన క‌ర‌క‌ర‌లాడుతూ లోప‌ల మెత్త‌గా ఉండే ఈ వ‌డ‌ల‌ను తయారు చేయ‌డం చాలా తేలిక. మొక్క‌జొన్న‌ల‌తో అంద‌రికి న‌చ్చేలా వ‌డ‌ల‌ను ఎలా తయారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
మొక్కజొన్న వ‌డ‌ల త‌యారీకి కావ‌ల్సిన ప‌దార్థాలు..
మొక్కజొన్న గింజలు – అరకిలో, బియ్యం పిండి – 2 టీ స్పూన్స్, ఉప్పు – త‌గినంత, చిన్న‌గా తరిగిన ఉల్లిపాయ – 1, తరిగిన క‌రివేపాకు – రెండు రెమ్మ‌లు, చిన్న‌గా తరిగిన ప‌చ్చిమిర్చి – 5 లేదా కారానికి త‌గిన‌న్ని, అల్లం త‌రుగు – ఒక టీ స్పూన్, జీల‌క‌ర్ర – ఒక టీ స్పూన్, నూనె – డీప్ ప్రైకు స‌రిప‌డా.
మొక్కజొన్న వ‌డ‌ల త‌యారీ విధానం..
ముందుగా ఒక జార్ లో మొక్కజొన్న గింజలు వేసి మ‌రీ మెత్త‌గా కాకుండా బ‌ర‌క‌గా ఉండేలా మిక్సీ ప‌ట్టుకుని గిన్నెలోకి తీసుకోవాలి. త‌రువాత ఇందులో నూనె త‌ప్ప మిగిలిన ప‌దార్థాల‌న్నీ వేసి బాగా క‌లుపుకోవాలి. ఇప్పుడు త‌గినంత పిండిని తీసుకుంటూ ఉండ‌లుగా చేసుకోవాలి. త‌రువాత క‌ళాయిలో నూనె పోసి వేడి చేయాలి. నూనె వేడ‌య్యాక ఒక్కో ఉండ‌ను తీసుకుంటూ బ‌ట‌ర్ పేప‌ర్ మీద లేదా ప్లాస్టిక్ క‌వ‌ర్ మీద, అర‌టి మీద వ‌డ‌లాగా వ‌త్తుకుని నూనెలో వేసుకోవాలి. ఈ వ‌డ‌లు మ‌రీ ప‌లుచ‌గా మ‌రీ మందంగా ఉండ‌కుండా చూసుకోవాలి. ఇప్పుడు ఈ వ‌డ‌ల‌ను మ‌ధ్య‌స్థ మంట‌పై ఎర్ర‌గా అయ్యే వ‌ర‌కు కాల్చుకుని ప్లేట్ లోకి తీసుకోవాలి.
ఇలా చేయ‌డం వల్ల ఎంతో రుచిగా ఉండే మొక్కజొన్న వ‌డ‌లు త‌యార‌వుతాయి. వీటిని ట‌మాట చ‌ట్నీ, ప‌ల్లీ చ‌ట్నీ వంటి వాటితో క‌లిపి తింటే చాలా రుచిగా ఉంటాయి. మొక్కజొన్న కంకుల‌ను ఎప్పుడూ ఉడికించి అలాగే కాల్చుకుని తిన‌డంతో పాటు అప్పుడ‌ప్పుడూ ఇలా వ‌డ‌ల‌ను కూడా తయారు చేసుకుని తిన‌వ‌చ్చు. ఈ మొక్కజొన్న వ‌డ‌ల‌ను ఒక్క‌టి కూడా విడిచిపెట్ట‌కుండా అంద‌రూ ఎంతో ఇష్టంగా తింటారు.
