మేక మాంసం, గొర్రె మాంసం రెండూ పోషకాల పరంగా విలువైనవే అయినప్పటికీ వీటి మధ్య కొన్ని ముఖ్యమైన తేడాలు ఉన్నాయి, వాటిని ఆధారంగా ఆరోగ్యానికి ఏది మంచిదో మీరే నిర్ణయించుకోవచ్చు. గొర్రె మాంసంతో పోలిస్తే మేక మాంసంలో కొవ్వు త‌క్కువ‌గా ఉంటుంది. అందువల్ల గుండె జ‌బ్బులు ఉన్నవారు మేక మాంసం తిన‌డం మంచిది. మేక మాంసంలో క్యాల‌రీలు త‌క్కువ‌గా ఉంటాయి. ఎక్కువ ప్రోటీన్లు ల‌భిస్తాయి. ఇత‌ర మాంసాల‌తో పోలిస్తే కొలెస్ట్రాల్ త‌క్కువ‌గా ఉంటుంది. జీర్ణం సుల‌భంగా అవుతుంది.
గొర్రె మాంసం విష‌యానికి వ‌స్తే ఇందులో కొవ్వు శాతం ఎక్కువగా ఉంటుంది. ఇది రుచికి బాగా ఉంటుందేమో గానీ కొవ్వు అధికమైన వారి ఆరోగ్యానికి మంచిది కాదు. గొర్రె మాంసం ఎక్కువ శక్తిని అందిస్తుంది. కొవ్వు అధికంగా ఉండడం వల్ల కొంతమందికి సమస్యగా మారవచ్చు. అధిక కొలెస్ట్రాల్ స్థాయి గుండె సంబంధిత సమస్యలకు కారణం కావచ్చు. కొవ్వు ఎక్కువగా ఉండడం వల్ల కొన్ని సందర్భాల్లో జీర్ణక్రియ నెమ్మదిగా జరుగుతుంది.
మరి ఈ రెండింటిలో ఏది ఆరోగ్యానికి మంచిది ? అంటే.. మీ ఆరోగ్య లక్ష్యాలు, వ్యక్తిగత రుచిపై ఆధారపడి ఉంటుంది. బ‌రువు తగ్గడం లేదా గుండె ఆరోగ్యాన్ని దృష్టిలో ఉంచుకుని చూస్తే మేక మాంసం ఎక్కువ ఆరోగ్యకరమైనది. శక్తి అవసరం ఎక్కువగా ఉన్నవారు లేదా శీతాకాలంలో ఎక్కువ కేలరీలు అవసరమై ఉంటే గొర్రె మాంసం ఉపయుక్తంగా ఉంటుంది. మృదువుగా ఉండాలనుకుంటే గొర్రె మాంసం మంచి ఎంపిక. బలమైన రుచి కావాలనుకుంటే మేక మాంసం మంచి ఎంపిక. మొత్తంగా చూస్తే.. ఆహారపు అవసరాలు, ఆరోగ్య పరిస్థితిని బట్టి మేక లేదా గొర్రె మాంసాన్ని ఎంచుకోవచ్చు. మోతాదును పరిమితంగా ఉంచడం, తక్కువ మసాలాలతో వండడం ఆరోగ్యానికి మరింత మంచిది.
