వయస్సు అనేది కేవలం శరీరానికి మాత్రమే, మనస్సుకు కాదు. మనస్సు ఉంటే మార్గం ఉంటుంది. ఏ వయస్సులో ఉన్న వారు అయినా ఎంత సేపైనా వ్యాయామం చేయవచ్చు. అవును.. సరిగ్గా ఇదే విషయాన్ని ఆయన నిరూపిస్తున్నారు. ఆయనే హైదరాబాద్కు చెందిన పాండే.
పాండే వయస్సు 75 ఏళ్లు. అయినప్పటికీ ఆయన ఫిట్నెస్, వ్యాయామం విషయంలో ఏమాత్రం వెనక్కి తగ్గరు. ఇటీవల ఓ కార్యక్రమంలో భాగంగా నిర్వహించిన సైకిల్ రైడ్ పోటీల్లో ఆయన పాల్గొని కేవలం 3 గంటల్లోనే 40 కిలోమీటర్ల దూరం సైకిల్ తొక్కి అందరినీ ఆశ్చర్యపరిచారు.
సఫిల్ గూడ పార్క్ నుంచి మొదలైన ఆయన సైకిల్ రైడ్ చార్మినార్ వద్ద ముగిసింది. ఇందుకు కేవలం 1 గంట మాత్రమే సమయం పట్టింది. ఇక రిటర్న్ వచ్చేటప్పుడు నెక్లెస్ రోడ్డు మీదుగా వచ్చారు. ఇందుకు 2 గంటల సమయం తీసుకుంది. మొత్తంగా 3 గంటల్లో ఆయన 40 కిలోమీటర్ల దూరం సైకిల్ తొక్కారు.
అయితే సైకిల్ తొక్కడం పాండేకు కొత్తేమీ కాదు. అది ఆయన దినచర్యలో ఒక భాగమే. రోజుకు సుమారుగా 40 నిమిషాల పాటు సైకిల్ తొక్కుతారు. 6-7 కిలోమీటర్ల దూరం వాకింగ్ చేస్తారు. ఆయనకు గతంలో మోకాలు కీళ్ల మార్పిడి శస్త్ర చికిత్స జరిగింది. అయినప్పటికీ ఆయన ఈ విధంగా వ్యాయామం చేస్తుండడం విశేషం. ఇక ఆయన రోజూ 7 నుంచి 10 తరగతి చదివే పేద విద్యార్థులకు పాఠాలు చెబుతుంటారు. రైల్వేలో ఇంజినీర్గా ఎన్నో రోజులు పనిచేసిన ఈయన రిటైర్ అయ్యాక ఈ విధంగా పేదలకు సహాయం చేస్తున్నారు. అంతే కాదు, ఫిట్ నెస్ విషయంలో తనకు సాటి ఎవరూ లేరని నిరూపిస్తున్నారు.