Bendakaya Vellulli Karam : మ‌నం ఆహారంగా తీసుకునే కూర‌గాయ‌ల్లో బెండ‌కాయ‌లు ఒక‌టి. బెండ‌కాయ‌ల‌ను ఆహారంగా తీసుకోవ‌డం వ‌ల్ల మ‌నం వివిధ ర‌కాల ఆరోగ్య ప్ర‌యోజ‌నాల‌ను కూడా పొంద‌వ‌చ్చు. బెండ‌కాయ‌ల‌తో చేసిన వంట‌కాలు చాలా రుచిగా ఉంటాయి. ఎక్కువ‌గా బెండ‌కాయ‌ల‌తో వేపుడును త‌యారు చేస్తూ ఉంటాం. బెండ‌కాయ‌ల‌తో చేసే వేపుడును చాలా మంది ఇష్టంగా తింటారు. ఈ బెండకాయ వేపుడులో వెల్లుల్లి కారాన్ని వేసి మ‌నం మ‌రింత రుచిగా ఈ వంట‌కాన్ని త‌యారు చేసుకోవ‌చ్చు. ఇలా చేసిన బెండకాయ వేపుడు కూడా చాలా రుచిగా ఉంటుంది. వెల్లుల్లి కారం వేసి బెండకాయ వేపుడును ఎలా త‌యారు చేసుకోవాలి.. త‌యారీకి కావల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
బెండకాయ వెల్లుల్లి కారం త‌యారీకి కావల్సిన ప‌దార్థాలు..
త‌రిగిన బెండ‌కాయ‌లు – అరకిలో, త‌రిగిన ఉల్లిపాయ – 1, వెల్లుల్లి రెబ్బ‌లు – 8, ఎండు కొబ్బ‌రి ముక్క‌లు – ఒక టేబుల్ స్పూన్, జీల‌క‌ర్ర – ఒక టీ స్పూన్, ప‌సుపు – అర టీ స్పూన్, కారం – ఒక టేబుల్ స్పూన్, నూనె – 2 టేబుల్ స్పూన్స్, ఉప్పు – త‌గినంత, క‌రివేపాకు – కొద్దిగా.
బెండకాయ వెల్లుల్లి కారం త‌యారీ విధానం..
ముందుగా జార్ లో వెల్లుల్లి రెబ్బ‌లు, ఎండు కొబ్బ‌రి ముక్క‌లు, కారం వేసి బ‌ర‌క‌గా మిక్సీ ప‌ట్టుకోవాలి. త‌రువాత క‌ళాయిలో నూనె వేసుకుని వేడి చేయాలి. నూనె వేడ‌య్యాక జీల‌క‌ర్ర, క‌రివేపాకు వేసి వేయించాలి. త‌రువాత ఉల్లిపాయ ముక్క‌లు వేసి వేయించాలి. ఇవి వేగిన త‌రువాత బెండకాయ ముక్క‌లు వేసి వేయించాలి. వీటిని మ‌ధ్య‌స్థ మంట‌పై క‌లుపుతూ వేయించుకోవాలి. బెండకాయ ముక్క‌లను క‌ర‌క‌రలాడే వ‌ర‌కు వేయించుకున్న త‌రువాత ఉప్పు, ప‌సుపు, మిక్సీ ప‌ట్టుకున్న వెల్లుల్లి కారం వేసి క‌లపాలి. దీనిని మ‌రో 5 నిమిషాల పాటు వేయించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే బెండకాయ వెల్లుల్లి కారం త‌యార‌వుతుంది. దీనిని అన్నంతో క‌లిపి తింటే చాలా రుచిగా ఉంటుంది. త‌ర‌చూ మామూలుగా చేసే బెండకాయ వేపుడు కంటే ఈ విధంగా వెల్లుల్లి కారం వేసి చేసే బెండకాయ వేపుడు మ‌రింత రుచిగా ఉంటుంది. దీనిని అంద‌రూ ఇష్టంగా తింటారు.
