Mango Chutney : వేసవికాలం వచ్చిందంటే పచ్చిమామిడికాయలు తినడానికి ఎంతో ఇష్టపడతారు. ఈ క్రమంలోనే పచ్చి మామిడి కాయలతో తయారు చేసే పచ్చడి అంటే ప్రతి ఒక్కరు లొట్టలేసుకుంటూ తింటారు. ఎంతో రుచికరమైన పచ్చి మామిడికాయ పచ్చడి తయారు చేయడం ఏ విధంగానో ఇక్కడ తెలుసుకుందాం. దీన్ని కింద చెప్పిన విధంగా చేయాలేగానీ ఎంతో రుచిగా ఉంటుంది. అంద‌రూ ఇష్టపడతారు. దీన్ని టిఫిన్స్ లేదా అన్నంలోనూ తిన‌వ‌చ్చు. ఒక్క‌సారి టేస్ట్ చేశారంటే మ‌ళ్లీ ఇలాగే చేసుకుంటారు.
పచ్చి మామిడికాయ చ‌ట్నీ తయారీకి కావలసిన పదార్థాలు..
పచ్చి మామిడికాయ – ఒకటి, ఎండు మిర్చి – 4, జీలకర్ర – 1 టేబుల్ స్పూన్, ఉప్పు – త‌గినంత, కరివేపాకు – 1 రెమ్మ, ఆవాలు – 1 టీస్పూన్‌, వెల్లుల్లి రెబ్బ‌లు – 4, ఉల్లిపాయ ముక్కలు – అర క‌ప్పు, నూనె – త‌గినంత.
పచ్చి మామిడికాయ చట్నీని తయారు చేసే విధానం..
ముందుగా పచ్చి మామిడికాయను పైన తొక్క తీసి చిన్న చిన్న ముక్కలుగా కట్ చేసి పెట్టుకోవాలి. స్టౌ పై కడాయి పెట్టి ఒక టేబుల్ స్పూన్ నూనె వేసి కరివేపాకులు, జీలకర్ర, 3 ఎండు మిరపకాయలు వేసి దోరగా వేయించాలి. మామిడికాయ ముక్కలు, వేయించి పెట్టుకున్న మిశ్రమాన్ని మిక్సీలో కాకుండా రోటిలో మెత్తగా రుబ్బుకోవాలి. మరొక కడాయిలో పోపు కోసం కొద్దిగా నూనె వేయాలి. నూనె వేడెక్కాక ఆవాలు, కరివేపాకు, ఎండు మిర్చి ముక్కలు, వెల్లుల్లి, ఉల్లిపాయ ముక్కలు వేసి వేయించాలి. ఆవాలు చిటపట అన్న తరువాత ముందుగా రుబ్బి పెట్టుకున్న మామిడికాయ పచ్చడిని ఆ కడాయిలో వేసి రెండు నిమిషాల పాటు సిమ్ లో ఉడకనివ్వాలి. ఈ విధంగా మామిడికాయ పచ్చడిని ఉడికించడం వల్ల పచ్చి వాసన రాదు. రెండు నిమిషాల తర్వాత స్టౌ ఆఫ్ చేస్తే ఎంతో రుచికరమైన మామిడికాయ పచ్చడి తయారైనట్లే. ఈ మామిడికాయ పచ్చడిని వేడి వేడి అన్నంలో కలుపుకుని తింటే ప్లేట్ మొత్తం ఖాళీ చేయాల్సిందే.
