Tomato Pudina Pachadi : మ‌నం పుదీనాతో ర‌క‌ర‌కాల వంట‌కాల‌ను త‌యారు చేస్తూ ఉంటాం. పుదీనాతో చేసే వంట‌కాలు చాలా రుచిగా ఉంటాయి. పుదీనాతో మ‌నం చేసుకోద‌గిన వంట‌కాల్లో పుదీనా ప‌చ్చ‌డి ఒక‌టి. దీనిని మ‌న‌లో చాలా మంది అప్పుడ‌ప్పుడూ చేస్తూ ఉంటారు. పుదీనా ప‌చ్చ‌డిని అన్నంతో క‌లిపి తింటే చాలా రుచిగా ఉంటుంది. ఈ పుదీనా ప‌చ్చ‌డిలో టమాటాలు వేసి మ‌రింత రుచిగా కూడా త‌యారు చేసుకోవ‌చ్చు. దీనిని త‌యారు చేయ‌డం కూడా చాలా సుల‌భం. ట‌మాట‌లు వేసి పుదీనా ప‌చ్చ‌డిని ఎలా త‌యారు చేసుకోవాలి… త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
ట‌మాట పుదీనా ప‌చ్చ‌డి త‌యారీకి కావ‌ల్సిన ప‌దార్థాలు..
పుదీనా క‌ట్ట‌లు – 4, త‌రిగిన టమాటాలు – 3, ఎండుమిర్చి – 10 లేద త‌గిన‌న్ని, చింత‌పండు – చిన్న నిమ్మ‌కాయంత, తాళింపు దినుసులు – ఒక టేబుల్ స్పూన్, క‌చ్చా ప‌చ్చాగా దంచిన వెల్లుల్లి రెబ్బ‌లు – 5, నూనె – 2 టేబుల్ స్పూన్స్, క‌రివేపాకు – ఒక రెమ్మ, ఉప్పు – త‌గినంత, వెల్లుల్లి రెబ్బ‌లు – 4, జీల‌క‌ర్ర – ఒక టీ స్పూన్.
ట‌మాట పుదీనా ప‌చ్చ‌డి త‌యారీ విధానం..
ముందుగా క‌ళాయిలో నూనె వేసి వేడి చేయాలి. నూనె వేడయ్యాక ఎండుమిర్చి వేసి వేయించాలి. వీటిని దోర‌గా వేయించి ఒక ప్లేట్ లోకి తీసుకోవాలి. త‌రువాత అదే క‌ళాయిలో పుదీనా వేసి వేయించాలి. దీనిని కూడా ద‌గ్గ‌ర‌చ ప‌డే వ‌ర‌కు వేయించి ప్లేట్ లోకి తీసుకోవాలి. త‌రువాత అదే క‌ళాయిలో మ‌రి కొద్దిగా నూనె వేసి వేడి చేయాలి. త‌రువాత ట‌మాట ముక్క‌లను, చింత‌పండును వేసి క‌ల‌పాలి. దీనిపై మూత పెట్టి ట‌మాట ముక్క‌లు మెత్త‌గా అయ్యే వ‌ర‌కు ఉడికించి స్ట‌వ్ ఆఫ్ చేసుకోవాలి. త‌రువాత జార్ లో వేయించిన ఎండుమిర్చి, ఉప్పు వేసి మెత్త‌గా మిక్సీ ప‌ట్టుకోవాలి. త‌రువాత వేయించిన పుదీనా, వెల్లుల్లి రెబ్బ‌లు, జీల‌క‌ర్ర వేసి మిక్సీ ప‌ట్టుకోవాలి. త‌రువాత ట‌మాట వేసి మెత్త‌గా మిక్సీ ప‌ట్టుకోవాలి.
ఇప్పుడు క‌ళాయిలో నూనె వేసి వేడి చేయాలి. నూనె వేడయ్యాక తాళింపు దినుసులు, రెండు ఎండుమిర్చి, క‌చ్చా ప‌చ్చాగా దంచిన వెల్లుల్లి రెబ్బ‌లు, క‌రివేపాకు వేసి వేయించాలి. త‌రువాత మిక్సీ ప‌ట్టుకున్న ప‌చ్చ‌డిని వేసి మ‌రో రెండు నిమిషాల పాటు క‌లుపుతూ వేయించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ట‌మాట పుదీనా ప‌చ్చ‌డి త‌యార‌వుతుంది. దీనిని వేడి వేడి అన్నం, నెయ్యితో క‌లిపి తింటే చాలా రుచిగా ఉంటుంది. త‌ర‌చూ చేసే పుదీనా ప‌చ్చ‌డి కంటే ఈ విధంగా టమాటాలు వేసిన పుదీనా ప‌చ్చ‌డిమ‌రింత రుచిగా ఉంటుంది. దీనిని అందరూ ఇష్టంగా తింటారు.
