శరీరానికి ఆహారం, నీరు ఎంత ముఖ్యమో నిద్ర కూడా అంతే అవసరం. నిద్రలేమి కారణంగా బరువు పెరగడం, గుండె సమస్యలు, టైప్‌-2 డయాబెటిస్, ఇమ్యూనిటీ తగ్గడం, ఒత్తిడి, జుట్టు ఊడటం, అరుగుదల సరిగా లేకపోవడం వంటి ఎన్నో సమస్యలొస్తాయి. నిద్ర ఆరోగ్యానికి మంచిదని కొంతమంది గంటల తరబడి నిద్రపోతూ ఉంటారు. నిద్ర తగ్గితేనే కాదు, ఎక్కువైనా ఆరోగ్య సమస్యలు వస్తాయని నిపుణులు అంటున్నారు. జాన్స్ హాప్కిన్స్ మెడిసిన్ నివేదిక ప్రకారం, ఎక్కువ సేపు నిద్రపోవడం వల్ల మీరు అనేక ఆరోగ్య సమస్యలు ఎదుర్కొంటారని వెల్లడించింది. ఎవరైనా, ఎల్లప్పుడూ నిద్రపోవడానికి ఆవకాశం కోసం ఎదురు చూస్తుంటే.. కచ్చితంగా డాక్టర్‌‌‌ను సంప్రదించడం మంచిదని జాన్స్ హాప్కిన్స్ మెడిసిన్ ప్రొఫెసర్ Vsevolod Polotsky అన్నారు. నిద్ర సమయం ప్రతి వ్యక్తికీ మారవచ్చుసాధారణంగా పెద్ద వారికి రాత్రుళ్లు ఏడు నుంచి తొమ్మిది గంటల నిద్ర అవసరమవుతుంది.
అయితే కొంతమంది సమయం దొరికితే చాలు, తొమ్మిది గంటలకు మించి మరీ నిద్రపోతుంటారు. దీన్నే అతి నిద్ర, హైపర్సోమ్నియా అంటారు. ఒకవేళ, మీరు 9 గంటల కంటే ఎక్కువగా నిద్రపోతుంటే.. మీకు ఆరోగ్య సమస్యలు వచ్చే అవకాశం ఉంది. ఎక్కువగా నిద్రపోయిన, నిద్ర తక్కువగా ఉన్నా.. బరువు పెరుగుతారు. ప్రతి రోజూ రాత్రి తొమ్మిది, దాని కంటే ఎక్కువ నిద్రపోయే వ్యక్తులు.. ఏడు నుంచి ఎనిమిది గంటల మధ్య నిద్రపోయే వారి కంటే ఆరేళ్ల కాలంలో ఊబకాయానికి గురయ్యే అవకాశం 21% ఎక్కువగా ఉందని తాజా అధ్యయనంలో తేలింది. ఎక్కువ గంటలు నిద్రపోవడం వల్ల.. రక్తంలో చక్కెర శాతం పెరుగుతుంది, శరీరంలో ఇన్సులిన్‌ ఉత్పత్తి తగ్గిపోతుందని నిపుణులు చెబుతున్నారు. దీని వల్ల డయాబెటిస్ వచ్చే ప్రమాదం ఉంది. ఎక్కువగా నిద్రపోయేవారిలో.. టైప్‌-2 డయాబెటిస్ వచ్చే ప్రమాదం ఎక్కువని నిపుణులు అంటున్నారు. అతి నిద్రకు, డిప్రెషన్‌కు సంబంధం ఉందని నిపుణులు చెబుతున్నారు.
డిప్రెషన్‌తో బాధపడుతున్న వారిలో 15% మంది ఎక్కువగా నిద్రపోతారని అంటున్నారు. అతి నిద్ర డిప్రెషన్‌ను తీవ్రతరం చేస్తుందని ప్రేర్కొంటున్నారు. డ్రిప్రెషన్‌ నుంచి బయటకు రావడానికి ఆరోగ్యకరమైన నిద్ర ముఖ్యం. అతినిద్ర వల్ల కూడా పలు మానసిక అనారోగ్యాలు సమస్యలు వచ్చే అవకాశం ఉందని నిపుణులు అంటున్నారు. రాత్రి సమయంలో ఎనిమిది గంటలు నిద్రపోయే స్త్రీల కంటే.. తొమ్మిది నుంచి 11 గంటలు నిద్రపోయే స్త్రీలకు కరోనరీ హార్ట్ డిసీజ్ వచ్చే అవకాశం 38% ఎక్కువగా ఉందని నర్సెస్‌ హెల్త్ సర్వే చెబుతోంది. ఈ అధ్యయనంలో దాదాపు 72,000 మంది మహిళలను పరిశీలించారు. తొమ్మిది గంటలకు మించి నిద్ర పోవడం వల్ల బ్రెయిన్‌ స్ట్రోక్‌ వచ్చే ప్రమాదమూ 23 శాతం పెరుగుతుందని నిపుణులు హెచ్చరిస్తున్నారు. అతి నిద్ర వల్ల మెదడుకు అందే రక్తప్రసరణపై ప్రతికూల ప్రభావం పడడమే ఇందుకు ప్రధాన కారణమ‌ని అంటున్నారు.
