ఇటీవ‌లి కాలంలో పని ఒత్తిడితో చనిపోతున్న వారి సంఖ్యక్ర‌మ‌క్ర‌మంగా పెరుగుతుంది. ఆఫీస్ సమయం కంటే అధికంగా పనిచేయడం, విరామం లేకుండా పనిచేయడం, తీవ్ర ఒత్తిడితో కూడిన ఉద్యోగాలు.. ఉద్యోగుల ప్రాణాల మీదికి తెస్తోంది. తాజాగా పని ఒత్తిడి కారణంగా ఆత్మహత్య చేసుకున్న ఓ ఉద్యోగి రాసిన సూసైడ్ లెటర్ తీవ్ర చర్చకు దారి తీస్తోంది. తాను 45 రోజులుగా నిద్రపోకుండా పనిచేశానని.. ఆ పని ఒత్తిడి తట్టుకోలేకే ప్రాణాలు తీసుకుంటున్నట్లు ఆ లేఖలో రాసుకొచ్చాడు.ఉత్తరప్రదేశ్‌లోని ఝాన్సీలో బజాజ్ ఫైనాన్స్‌లో ఏరియా మేనేజర్‌గా పనిచేస్తున్న 42 ఏళ్ల వ్యక్తి ఆత్మహత్యకు పాల్పడ్డాడు. తరుణ్ సక్సేనా గత రెండు నెలలుగా తన లక్ష్యాలను చేరుకోవాలని తన సీనియర్లు తనపై ఒత్తిడి తెస్తున్నారని, జీతం తగ్గింపులతో బెదిరిస్తున్నారని ఒక నోట్‌లో పేర్కొన్నాడు.
తన భార్య, ఇద్దరు పిల్లలను మరో గదిలో బంధించి అతడు ఆత్మహత్యకు పాల్పడ్డాడు. అతడికి తల్లిదండ్రులు, భార్య మేఘా, పిల్లలు యథార్థ్ మరియు పిహు ఉన్నారు. తన భార్యను ఉద్దేశించి ఐదు పేజీల లేఖలో, తరుణ్ తన శాయశక్తులా ప్రయత్నించినప్పటికీ లక్ష్యాలను చేరుకోలేక తీవ్ర ఒత్తిడిలో ఉన్నానని రాశాడు. తరుణ్‌కు అతని ప్రాంతం నుండి బజాజ్ ఫైనాన్స్ లోన్‌ల ఈఎంఐల సేకరణ బాధ్యత ఉంది, కానీ అనేక సమస్యల కారణంగా లక్ష్యాలను చేరుకోలేకపోయాడు. తన ఉద్యోగం పోతుందేమోనని ఆందోళన చెందుతున్నానని కూడా చెప్పాడు. తన సీనియర్లు తనను పదే పదే అవమానించారని రాశారు. “నేను భవిష్యత్తు గురించి చాలా టెన్షన్‌గా ఉన్నాను. నేను ఆలోచించే సామర్థ్యాన్ని కోల్పోయాను. నేను వెళ్తున్నాను” అని తరుణ్ లేఖలో పేర్కొన్నారు.
ఇక తన పిల్లల స్కూల్ ఫీజులను సంవత్సరం చివరి వరకు చెల్లించానని, కుటుంబ సభ్యులకు క్షమాపణలు చెబుతూ లేఖ రాసారు. “మీరంతా మేఘా, యథార్థ్, పీహులను జాగ్రత్తగా చూసుకోండి. అమ్మానాన్ని మిమ్మల్ని నేనెప్పుడూ ఏమీ అడగలేదు, ఇప్పుడు అడుగుతున్నాను. నా భార్యా పిల్లలు ఉండేందుకు దయచేసి రెండో అంతస్తును నిర్మించి ఇవ్వండి” అని తరుణ్ తన తల్లిదండ్రులను లేఖలో కోరాడు. . తన కుటుంబానికి బీమా సొమ్ము అందేలా చూడాలని బంధువులను కోరారు. అతను తన సీనియర్ల పేర్లను కూడా పేర్కొన్నాడు, వారిపై పోలీసు ఫిర్యాదును నమోదు చేయమని అతని కుటుంబాన్ని కోరాడు. “నా ఆత్మహత్య నిర్ణయానికి వారే బాధ్యులు” అని లేఖలో పేర్కొన్నారు. ఇటీవల మహారాష్ట్ర‌లోని పూణేలో యర్నెస్ట్ అండ్‌ యంగ్‌ ఇండియా కంపెనీలో పనిచేస్తున్న 26 ఏళ్ల అన్నా సెబాస్టియన్ అనే ఛార్టర్డ్‌ అకౌంటెంట్‌ మృతి చెందిన ఘటన దేశవ్యాప్తంగా పెను ప్రకంపనలు రేపిన విష‌యం మ‌నంద‌రికి తెలిసిందే.
