Mutton Kurma : మటన్ తో మనం అనేక రకాల వంటకాలను తయారు చేస్తూ ఉంటాము. మటన్ తో చేసే వంటకాలు చాలా రుచిగా ఉంటాయి. చాలా మందివీటిని ఇష్టంగా తింటూ ఉంటారు. మటన్ తో చేసే వంటకాలను తీసుకోవడం వల్ల మన ఆరోగ్యానికి కూడా మేలు కలుగుతుంది. మటన్ తో మనం రుచితో చేసుకోదగిన రుచికరమైన వంటకాల్లో మటన్ కుర్మా కూడా ఒకటి. అన్నం, చపాతీ, రోటీ, సంగటి వంటి వాటితో తినడానికి ఇది చాలా చక్కగా ఉంటుంది. దీనిని తయారు చేసుకోవడం కూడా చాలా సులభం. బ్యాచిలర్స్, వంటరాని వారు కూడా ఈ మటన్ కుర్మాను సులభంగా తయారు చేసుకోవచ్చు. తిన్నా కొద్ది తినాలనిపించేంత రుచిగా ఉండే ఈ మటన్ కుర్మాను ఎలా తయారు చేసుకోవాలి.. తయారీకి కావల్సిన పదార్థాలు ఏమిటి.. అన్న వివరాలను ఇప్పుడు తెలుసుకుందాం.
మటన్ కుర్మా తయారీకి కావల్సిన పదార్థాలు..
మటన్ – అరకిలో, ఉల్లిపాయ ముక్కలు – ఒక కప్పు, నూనె – 4 టేబుల్ స్పూన్స్, పొడుగ్గా తరిగిన ఉల్లిపాయలు – 2 టేబుల్ స్పూన్స్, బిర్యానీ ఆకులు – 2, అల్లం వెల్లుల్లి పేస్ట్ – ఒక టేబుల్ స్పూన్, పసుపు – అర టీ స్పూన్, ఉప్పు – తగినంత, కారం – ఒక టేబుల్ స్పూన్, తరిగిన పచ్చిమిర్చి – 4, తరిగిన కొత్తిమీర – కొద్దిగా, నీళ్లు – 2 కప్పులు, కసూరిమెంతి – అర టీ స్పూన్.
![Mutton Kurma : మటన్ కుర్మాను ఇలా చేయండి.. అన్నంలో కలిపి తింటే సూపర్గా ఉంటుంది..! Mutton Kurma recipe make in this way very tasty with rice](https://i0.wp.com/ayurvedam365.com/wp-content/uploads/2024/02/mutton-kurma.jpg?resize=1200%2C675&ssl=1)
మసాలా తయారీకి కావల్సిన పదార్థాలు..
దాల్చిన చెక్క – 2 ముక్కలు, స్టోన్ ప్లవర్ – కొద్దిగా, పెద్ద యాలక్కాయ – 1, అనాస పువ్వు – 1, యాలకులు – 4, లవంగాలు – 5, జీలకర్ర – ఒక టీ స్పూన్, ధనియాలు – ఒక టేబుల్ స్పూన్, జీడిపప్పు – 4, టమాట ముక్కలు – అర కప్పు.
మటన్ కుర్మా తయారీ విధానం..
ముందుగా జార్ లో మసాలా దినుసులు, జీడిపప్పు వేసి మెత్తగా మిక్సీ పట్టుకోవాలి. తరువాత ఇందులోనే టమాట ముక్కలు వేసి మెత్తగా మిక్సీ పట్టుకుని గిన్నెలోకి తీసుకోవాలి. తరువాత అదే జార్ లో ఉల్లిపాయ ముక్కలు వేసి మెత్తని పేస్ట్ లాగా చేసుకుని పక్కకు ఉంచాలి. తరువాత కుక్కర్ లో నూనె వేసి వేడి చేయాలి. నూనె వేడయ్యాక ఉల్లిపాయ ముక్కలు, బిర్యానీ ఆకులు వేసి వేయించాలి. ఉల్లిపాయ ముక్కలు ఎర్రగా వేగిన తరువాత ఉల్లిపాయ పేస్ట్ వేసి వేయించాలి. ఇది ఎర్రగా వేగిన తరువాత మసాలా పేస్ట్ వేసి వేయించాలి. తరువాత మటన్ వేసి కలపాలి. దీనిని 4 నిమిషాల పాటు వేయించిన తరువాత అల్లం వెల్లుల్లి పేస్ట్, పసుపు, ఉప్పు, కారం, పచ్చిమిర్చి వేసి కలపాలి. తరువాత మూత పెట్టి నూనె పైకి తేలే వరకు బాగా వేయించాలి.
తరువాత కొత్తిమీర వేసి కలపాలి. ఇప్పుడు తగినన్ని నీళ్లు పోసి మూత పెట్టి 4 నుండి 5 విజిల్స్ లేదా మటన్ మెత్తగా అయ్యే వరకు ఉడికించి స్టవ్ ఆఫ్ చేసుకోవాలి. కుక్కర్ ఆవిరి పోయిన తరువాత మూత తీసి మరలా స్టవ్ ఆన్ చేసి కసూరిమెంతి వేసి కలపాలి. దీనిని మరో నిమిషం పాటు ఉడికించి స్టవ్ ఆఫ్ చేసుకుని సర్వ్ చేసుకోవాలి. ఇలా చేయడం వల్ల ఎంతో రుచిగా ఉండే మటన్ కుర్మా తయారవుతుంది. ఈ మటన్ కుర్మాను దేనితో తీసుకున్నా కూడా చాలా రుచిగా ఉంటుంది. ఈ కుర్మాను అందరూ ఎంతో ఇష్టంగా తింటారు.